Goa Police : पोलिस रेकॉर्डस् होणार डिजिटलाईज्ड

Goa Police : राज्यातील सर्व सरकारी खाती डिजिटलाईज्ड करण्याची प्रक्रिया सरकारने सुरू केली आहे. या पार्श्‍वभूमीवर गोवा पोलिसांचा फायर ब्लॉकचेन कंपनीशी आज समझोता करार (एमओयू) झाला. पोलिस रेकॉर्डस् डिजिटाईज्ड करण्याचे काम येत्या वर्षभरात पूर्ण केले जाणार आहे. त्यामुळे खात्याचा कारभार पारदर्शक होण्याबरोबरच पूर्ण काम कागदमुक्त (पेपरलेस) होणार आहे. कंपनीला दिला जाणारा रेकॉर्डस् हा सुरक्षित असेल, अशी माहिती गुन्हा अन्वेषण विभागाच्या गुन्हे शाखेचे पोलिस अधीक्षक निधीन वाल्सन यांनी दिली.

राबंदर येथील गुन्हे शाखा कार्यालयात हा करार गोवा पोलिसांतर्फे अधीक्षक वाल्सन तसेच फायर ब्लॉकचेन कंपनीचे संस्थापक व सीईओ प्रतीक गौरी यांनी केला. यावेळी पोलिस उपअधीक्षक सूरज हळर्णकर, निरीक्षक तेरेन्झ वाझ व कंपनीचे अधिकारी अर्जुन प्रसाद उपस्थित होते.

एनआयसीसोबत फाईल मॅनेटमेंट सिस्टम सुरू केली जाणार आहे व त्यासाठी सीसीटीएनएस सिस्टीमचीही मदत घेतली जाणार आहे. येणाऱ्या खर्चासंदर्भात सरकारबरोबर चर्चा सुरू असल्याचे वाल्सन म्हणाले.

नागरिकांना मिळणार चांगली सेवा

फायर ब्लॉकचेन ही देशातील स्टार्टअप क्षेत्रातील तिसऱ्या क्रमांकावरील कंपनी आहे. या कंपनीद्वारे अत्याधुनिक तंत्रज्ञानाचा वापर रेकॉर्डस् डिजिटाईज्ड करण्यासाठी वापरण्यात येणार आहे. त्यामुळे नागरिकांना चांगल्या सेवा मिळू शकणार आहेत. पोलिस रेकॉर्डस् डिजिटाईज्ड करून खाते कागदमुक्त करण्यासाठी ही कंपनी साधनसुविधा व मदत करणार आहे, अशी माहिती पोलिस अधीक्षक निधीन वाल्सन यांनी दिली.