Goa Rain: निसर्गाच्या त्रिवेणी संगमाची सांगेवासीयांना अनुभूती!

Goa Rain: निसर्ग चक्र बदलले असून सकाळी ऊन, संध्याकाळी जोरदार पाऊस अन् पहाटे गडद धुके पडू लागल्याने तिन्ही ऋतू एकाचवेळी अनुभवायचा योग सध्या सांगेवासीयांना आला आहे. गेले पाच सहा दिवस रोज संध्याकाळी गडगडाटासह पाऊस पडतो. पहाटेपासून सकाळपर्यंत धुके पडते आणि दुपारपर्यंत कडक ऊन असते. असा निसर्गाचा त्रिवेणी संगम सांगेवासीयांना अनुभवायला मिळत आहे.

वास्तविक परतीचा पाऊस सुरू झाल्याचे चित्र निर्माण झालेले असताना पडणारा पाऊस (Rain) मृग नक्षत्राप्रमाणे बरसू लागला आहे. दिवाळी जवळ येताच पाऊस कमी होऊन गुलाबी थंडीची चाहूल लागत असते, पण सध्याची स्थिती पाहता विचित्र वातावरण निर्माण झाले आहे. सध्या पडणारा पाऊस बळीराजाला मारक आहे.

उभे पीक आडवे पडून पावसाचे पाणी शेतात साचल्यास धान्य कुजून जाण्याची भीती अधिक असते. गेल्या वर्षी असेच वातावरण निर्माण होऊन अनेक शेतकऱ्यांना आर्थिक फटका सहन करावा लागला होता. सकाळी धुके, दुपारी उन्ह आणि संध्याकाळी जोरदार पाऊस अशी स्थिती याआधी कधीच नव्हती. निसर्गाचा समतोल ढासळल्याने सध्याची ही स्थिती निर्माण झाली असल्याचे जाणकारांचे मत आहे.

पिकांचे नुकसान

कष्टकरी समाज चार पैसे मिळावे म्हणून आपल्या परसबागेत झेंडूची लागवड करतात. त्याचा फायदा दिवाळी (Diwali) सणाला होत असतो, पण असा पाऊस दररोज पडू लागल्यास फुले कुजून नासाडी होत असते. परिणाम म्हणून हातात चार पैसे पडण्याआधीच परिश्रम वाया गेलेले असतात. यंदा चतुर्थी सणाला पडलेल्या पावसाने कष्टकरी समाजाची काकडी, चिबूड, दोडकी यासारख्या पिकांची हानी झाली. एकूणच हा पाऊस नुकसान करणारा ठरला आहे.