Goa Raj Bhavan: गोव्यात राजभवनातर्फे सोमवारी होणार 5 पुस्तकांचे प्रकाशन

Goa Raj Bhavan: गोव्यात राजभवनतर्फे 29 मे रोजी 'नई पहल' योजनेअंतर्गत 5 पुस्तकांचे प्रकाशन करण्यात येणार आहे. गोव्याचे राज्यपाल पी. एस. श्रीधरन पिल्लई यांनी शनिवारी याबाबतची घोषणा केली.

राजभवनच्या पुस्तक प्रायोजक योजनेंतर्गत ही पुस्तके प्रकाशित करण्यात येणार आहेत. ही पुस्तके कोकणी, मराठी आणि इंग्रजी भाषेतील आहेत.

या कार्यक्रमाला ज्ञानपीठ पुरस्कार विजेते गोव्यातील लेखक दामोदर मावजो यांची उपस्थिती असणार आहे.

संजय रमेश सालेलकर (कोंकणी), पल्लवी पोळेकर (मराठी), अॅड. मनोहर आडपाईकर (मराठी) या लेखकांनी ही पुस्तके लिहिली आहेत. तर पाचू मेनन यांची इंग्रजीतील दोन पुस्तके आहेत.

पिल्लई म्हणाले की, राजभवनने फेब्रुवारीमध्ये नवीन लेखकांसाठी एक नाविन्यपूर्ण योजना जाहीर केली होती, ज्या अंतर्गत राजभवन नवलेखकांची पुस्तके प्रकाशित करणार होते. कोंकणी, मराठी, हिंदी आणि संस्कृतमध्ये लिहिणाऱ्यांसाठी ही योजना होती.

या पुसत्कांच्या प्रकाशनाचा खर्च राजभवन प्रायोजित करत आहे. नंतर इंग्रजीचाही या योजनेत समावेश करण्यात आला.

या योजनेत पुस्तकांचे विषय काल्पनिक, नॉन फिक्शन, कविता, आत्मचरित्र किंवा कथांचे संकलन असू शकते.

पुस्तकाच्या विक्री प्रक्रियेत राजभवनचा सहभाग असू शकत नाही, परंतु नवीन लेखकांना पुढे येण्यास आणि त्यांची साहित्यातील सर्जनशील प्रतिभा सिद्ध करण्यास मदत होईल, असेही राज्यपाल म्हणाले.