Water Shortage: गोव्यात ऐन नाताळच्या सणात हरमल भागातील लोकांचे पाण्यासाठी हाल

Water Shortage: हरमल येथील किनारी भागात पाण्याची टंचाई निर्माण झाल्याने ऐन ख्रिसमसच्या सणात ग्रामस्थांचे बरेच हाल झाल्याने तीव्र नाराजी व्यक्त होत आहे. विशेषतः खालचावाडा भागात गेले आठ दिवस पाण्याचा थेंब मिळाला नसल्याचे नागरिकांनी सांगितले. चांदेल व अन्य ठिकाणी होणारी टंचाई किनारपट्टी भागात प्रामुख्याने का जाणवते असा सवाल आहे.

तिलारी कालवा नादुरुस्त झाल्याने ग्रामीण भागात टंचाई होते. मात्र, शहरी भागांतील मोठ्या वस्त्यांना पाण्याची सोय केली जाते, याबाबत खात्याने स्पष्टीकरण द्यावे अशी नागरिकांची मागणी आहे. दरम्यान, नानोस्करवाडा उपनदीबाबत खात्याने शुद्धीकरण व अन्य प्रक्रिया केल्यास पाण्याचा अपव्यय होणार नाही व त्या शुद्ध पाण्याचा लाभ उपेक्षित घटकांना मिळू शकतो.

बुस्टर पंपबाबत खात्याचे ठोस धोरण नसल्याने पाण्याची चोरी नित्य होत असल्याने खात्याच्या कारभाराला जनता कंटाळली आहे. पाणी चोरी करून बिले अनियमित भरून खात्याला वेठीस धरतात तर विनापंप मिळणारे पाणी व त्याची बिले प्रामाणिकपणे भरणाऱ्या लोकांना पाणी टंचाई भेडसावते.

नागरिकांनी बिले का भरावीत असा सवाल व्यक्त होत आहे. पुरवठा खात्याने पाणी पुरवठ्याबाबत गंभीरपणे लक्ष घालून ग्रामीण भागातील वितरणात नियोजन केल्यास तीव्रता जाणवणार नाही, अशी मागणी होत आहे.

उदय गवंडी, माजी सरपंच

पालये पंचायत क्षेत्रातील मधलावाडा, नबावाखानवाडा आदी भागांत पाण्याची तीव्र टंचाई होत आहे. पाण्याची समस्या ही दोन महिन्यापुरती नसून अलिकडे डिसेंबर महिन्यापासून सुरू होत आहे. खात्याकडून उपाययोजना होत नाही. पालये भागात अनेक ठिकाणी पाण्याचे झरे व नाले आहेत. त्यावर प्रक्रिया करून पाण्याचा पुरवठा होऊ शकतो का याची चाचपणी केली पाहिजे.

जित आरोलकर, आमदार, मांद्रे मतदारसंघ-

संस्थेच्या माध्यमातून टँकरद्वारे पाणी पुरवठा करून सामान्य लोकांना मदतीचा हात देत असल्याने समाधान वाटते. अरुंद रस्ता व उंच भागात नागरिकापर्यत टँँकर पोचत नसल्याने थोडीशी गैरसोय होत असल्याचे दिसून येते.