Goa Agriculture: शहरी भागातदेखील फुलले आरोग्यदायी भाज्यांचे मळे

Goa Agriculture: शहरी भागात आपल्याला केवळ मोठमोठ्या इमारती, गाड्यांचा गोंगाट आणि नव्याने सुरू असलेली इमारतीची बांधकामे दिसतात; परंतु राजधानी पणजीलगत ताळगावात आजही अनेक शेतकरी आपली परंपरागत शेती करतात.

पालेभाज्या, फळभाज्यांसहित मिरची व कांद्याची लागवड करण्यात येते. तसेच ताळगाव परिसरात पिकणाऱ्या रताळ्यांना अधिक मागणी असते.

राज्यात रब्बी हंगामानिमित्त विविध प्रकारची पिके शेतकऱ्यांद्वारे घेण्यात येत आहेत. राज्यातील ग्रामीण भागात मोठ्या प्रमाणात शेतकरी भाज्यांचे उत्पादन घेत असून यात प्रामुख्याने लालभाजी, चिटकी, भेंडी, दुधी भोपळा, वांगी, मुळा, पालक, वाली, दोडकी, काकडी, रताळी आदी भाज्यांसहित मिरची, कांदा लागवडदेखील मोठ्या प्रमाणात करण्यात आली आहे.

पिकांवर पडतेय कीड

पिकांवर पडणाऱ्या किडीबाबत कृषी संचालक नेविल आल्फोन्सो म्हणाले, पिकांच्या किडीपासून बचावासाठी विविध प्रकारच्या किटकनाशकांचा वापर करणे गरजेचे आहे. पिकाच्या सकस वाढीसाठी लागणारे विविध घटक, पाणी, खत चांगल्या प्रकारे वेळेवर पुरविणे गरजेचे आहे.

फलोत्पादन महामंडळात भाजी विक्री

राज्यातील शेतकरी नारळ, सुपारीच्या पिकासोबतच हंगामी उत्पादनदेखील घेतात. अनेक शेतकरी फलोत्पादन महामंडळाला आपली भाजी विकत असतात तर काही शेतकरी आठवडी बाजारात आपले उत्पादन विकत असतात. शहरी भागातील ग्राहकांचा कल हा स्थानिक उत्पादने खरेदीकडे अधिक असतो.