Canacona News: 'त्या' कुटुंबाला मिळणार हक्कच छपर, सभापतींच्या संकल्पनेला काणकोण वासियांचा प्रतिसाद

Canacona News सभापती रमेश तवडकर यांनी आज काणकोण गावडोंग्री येथील भाटू वेळीप यांची भेट घेतली. श्रम-धाम या योजनेतून वेळीप यांच्या नवीन घराच्या बांधकामाचा शुभारंभ उद्या होणार आहे. याच पार्श्वभूमीवर आज सभापतींनी वेळीप यांची भेट घेतली.

गोव्याला स्वातंत्र्य मिळून 60 वर्ष पूर्ण होऊनही एखादे कुटुंब घराविना असणे हे योग्य नाही. गरिबातल्या गरिबाकडे देखील स्वतःचे घर असावे हा निर्धार करून सभापती तवडकर यांनी हि योजना सुरु केली.

प्रत्येकाने स्वतःला जमेल तशी आर्थिक आणि शारीरिक मदत करून गरजूंच्या डोक्यावर छप्पर उभारणे हाच या संकल्पनेचा मूळ गाभा. 25 फेब्रुवारीला या योजनेचा अधिकृत शुभारंभ झाला.

काणकोणमध्ये अंदाजे 14 घरं या योजनेच्या माध्यमातून उभारली जात आहेत. खोतीगाव येथे याच योजनेच्या माध्यमातून एक घर उभारले गेले आहे.

माणुसकी आणि ग्रामव्यवस्था अबाधित राहणे हाच शुद्ध हेतू ठेऊन ही योजना सुरु केली असल्याचे तवडकर यांनी स्पष्ट केले आहे. लोकसहभागातून अशी कामे होत असून आपली जुनी ग्रामव्यवस्था या निमित्ताने टिकून राहील अशी अपेक्षा त्यांनी व्यक्त केलीय.