नुवे येथील माडांच्‍या बागेत सापडली मानवी हाडे

मडगाव: नुवे (Nuvem) येथे एका माडांच्‍या बागेत काल मानवी हाडे सापडल्‍याने खळबळ उडाली. हा घातपाताचा प्रकार असण्याची शक्यता गृहीत धरून मायणा-कुडतरी पोलिसांनी अज्ञात व्यक्तीविरोधात खुनाचा गुन्हा (Crime) नोंद केला आहे.

काल शुक्रवारी ही हाडे (Bones) सापडली होती. ती पुरुषाची की महिलेची हेही कळत नव्हते. मात्र घटनास्थळी आढळून आलेले लांब केस आणि बांगड्या यामुळे ती महिलेच्या मृतदेहाची हाडे असावीत असा अंदाज पोलिसांनी (Police) बांधला आहे. हा मृत्यू बऱ्याच दिवसांपूर्वी झाला असण्याची शक्यताही पोलिसांनी व्यक्त केली आहे.

मडगावचे (Margao) पोलिस उपअधीक्षक हरीश मडकईकर यांनी घटनास्थळी जाऊन पाहणी केली. तर, हा घातपाताचा प्रकार असल्याची शक्यता पोलिस महासंचालक इंद्रदेव शुक्ला यांनी गृहीत धरून खुनाचा गुन्हा नोंद करण्याचा आदेश दिला होता. पोलिस निरीक्षक सागर एकोस्‍कर या प्रकरणी पुढील तपास करीत आहेत.