Noida: नवरा बायकोची 'अमीरों की स्कीम' चौपट परताव्याचे आमिष, करोडोंची फसवणूक, गोव्यातही होते कार्यालय

Financial Fraud News From Noida: मार्केटिंग कंपनी उघडून 4 महिन्यांत चौपट परतावा देण्याच्या बहाण्याने पैसे गुंतवून फसवणूक करणाऱ्या पती-पत्नीला पोलिसांनी अटक केली आहे. चौकशी केल्यानंतर सेक्टर-63 पोलीस ठाण्याने संपूर्ण रॅकेटचा खुलासा केला आहे.

पोलिसांनी दिलेल्या माहितीनुसार, पती-पत्नी पूर्वी वेगवेगळ्या खासगी कंपनीत काम करत होते. मग झटपट श्रीमंत होण्याच्या इच्छेतून त्यांनी मार्केटिंग कंपनी उघडली.

अनेकांनी श्रीमंत होण्याचे स्वप्न दाखवून गुंतवणूक करायला भाग पाडले. गुंतवणूक केल्यानंतर त्यांना परतावा दिला नाही, असा आरोप या दाम्पत्यावर करण्यात आला आहे. शेकडो लोकांची मूळ रक्कमही परत करण्यात आली नाही.

या दोघांनी देशातील विविध शहरांतील 980 हून अधिक लोकांची 5 कोटींहून अधिक रुपयांची फसवणूक केल्याचा पोलिसांनी अंदाज व्यक्त केला आहे. त्यांच्या ताब्यातून 40 लाख रुपये किंमतीच्या दोन आलिशान गाड्या जप्त करण्यात आल्या आहेत.

मिळालेल्या माहितीनुसार, विजय किशन जैस्वाल आणि रश्मी जयस्वाल अशी आरोपींची नावे आहेत, ते दिल्लीतील संगम विहार येथील रहिवासी आहेत. फ्लॅट खरेदी करून दोघेही सध्या सेक्टर-143 येथील सोसायटीत राहत होते.

आरोपींनी सेक्टर-63च्या एच ब्लॉकमध्ये त्यांचे कार्यालय उघडले होते. उडिवो मार्केटिंग प्रायव्हेट लिमिटेड असे त्यांच्या कंपनीला नाव देण्यात आले होते. दाम्पत्य वेबसाइटवरून गुंतवणूक करण्यास इच्छुक लोकांचा डेटा गोळा करायचे. त्यांनी काही कर्मचाऱ्यांना देखील कामावर ठेवले होते. त्यांना 12 ते 20 हजार रुपये पगार दिला जात होता. कोणी नवीन गुंतवणूकदार आणल्यास त्याला प्रोत्साहन म्हणून लगेच कमिशन दिले जात होते.

आरोपी पती-पत्नीविरुद्ध जुलै-2022 मध्ये नोएडामध्ये गुन्हा दाखल करण्यात आला होता. यानंतर येथील कार्यालय बंद करून तो फरार झाला होता. पुढील तपासात त्यांच्याविरुद्ध दिल्ली, गोवा, बरेली येथेही गुन्हे दाखल असल्याचे समोर आले आहे.