पेडणे : पोलिसांच्या आर्थिक गुन्हे विभागाने काल मगो पक्षाचे नेते तथा उदरगत संस्थेचे अध्यक्ष जीत आरोलकर यांची सुमारे पाच तास चौकशी केली. याबाबत आरोलकर यांच्याशी संपर्क साधला असता ते म्हणाले की, जिल्हा पंचायत निवडणुकीसाठी पेडणे व मांद्रेतील आमदारांच्या पायाखालची वाळू सरकत आहे. त्यामुळे वैफल्यातून त्यांच्याकडून सत्तेचा दुरुपयोग करून मला त्रास देण्याचा प्रयत्न सुरू केला आहे. चौकशीच्या नावाखाली आपल्याला फक्त बसवून ठेवल्याचा आरोप त्यांनी केला.
आरोलकर म्हणाले की, मतदारांकडून आपल्याला उत्स्फूर्त प्रतिसाद मिळत आहे. तिन्ही मतदारसंघात मगोच्या उमेदवारांचा विजय निश्चित आहे. त्यामुळे दोघाही आमदारांसमोर त्यांच्या प्रतिष्ठेचा व राजकीय भवितव्याचा प्रश्न उभा राहिला आहे. माझ्याविरुध्द एक तक्रार आहे. पण चौकशीची ही वेळ निश्चित नाही. आर्थिक गुन्हे विभागाने नोटीस घेऊन काल रात्री पेडणे पोलिस येतात काय आणि मला बोलावून घेतात काय हे मजेशीर आहे. काही दिवसांपूर्वी माझा मांद्रे येथे मगो पक्षात प्रवेश होता. त्यावेळी पोलिसांचा वापर करून या लोकांनी विघ्न आणण्याचा प्रयत्न केला. दुसरीकडे काल निवडणूक प्रचार संपला असताना हरमलमध्ये भाजपची जाहीर सभा घेतली. या सभेला भाजपचे अध्यक्ष तानावडे उपस्थित होते. सत्तेचा दुरुपयोग करणाऱ्यांना या निवडणुकीत मतदार चांगला धडा शिकवतील, असा विश्वास जीत आरोलकर यांनी व्यक्त केला. दरम्यान, उपमुख्यमंत्री बाबू आजगावकर यांनी या प्रकाराबद्दल आपणाला काहीही माहीत नसल्याचे सांगितले. आरोलकर निर्दोष असतील तर त्यांना घाबरण्याची काही गरज नाही, असे ते म्हणाले. आमदार दयानंद सोपटे म्हणाले, जीत आरोलकर यांच्या चौकशी प्रकरणात माझे काहीही देणे-घेणे नाही असे सांगितले आहे.
अधिक वाचा :
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.