पणजी फुटबॉलर्सच्या विजयात इरफानची 'हॅटट्रिक'

पणजी: इरफान यादवाड याच्या हॅटट्रिकच्या बळावर गोवा पोलिस कप फुटबॉल (Goa Police Cup Football) स्पर्धेत पणजी फुटबॉलर्सने मार्नाच्या सेंट सेबॅस्तियन स्पोर्टस क्लबचा 5-0 फरकाने धुव्वा उडविला. सामना सोमवारी म्हापसा येथील धुळेर स्टेडियमवर झाला. सामन्याच्या पूर्वार्धात पणजी फुटबॉलर्स संघ 2-0 फराने आघाडीवर होता. सामन्याच्या 65 व्या मिनिटास रेफरीने धोकादायक खेळाबद्दल पणजी फुटबॉलर्सच्या फ्रँकी ओलिव्हेरा याला थेट रेड कार्ड दाखविण्यात आले. एक खेळाडू कमी होऊनही त्याचा परिणाम पणजी फुटबॉलर्सच्या वर्चस्वावर झाला नाही. त्यांनी थाटात उपांत्यपूर्व फेरीत प्रवेश केला.

पणजी फुटबॉलर्सच्या विजयात इरफान यादवाडच्या तीन गोलव्यतिरिक्त चंदन गावस व जॉयसन गांवकार यांनी प्रत्येकी एक गोल केला. चंदनने संघाचा पहिला गोल 22 व्या मिनिटास केला, नंतर इरफानने 33 व्या मिनिटास पणजी संघाची आघाडी वाढविली. 46 व्या मिनिटास इरफान सामन्यातील वैयक्तिक दुसरा गोल केला. 81 व्या मिनिटास जॉयसन याने पणजी फुटबॉलर्सची आघाडी 4-0 अशी भक्कम केली. सामन्याच्या 90+1 व्या मिनिटास इरफानने हॅटट्रिकचा मान मिळवत संघाच्या मोठ्या विजयावर शिक्कामोर्तब केले. इरफान सामन्याचा मानकरी ठरला.