गोव्यातून चोर्लाघाटमार्गे बेळगावला जाणाऱ्या रस्त्याची कर्नाटकच्‍या हद्दीत झालेली दुरवस्था सरकारी अधिकाऱ्यांच्या निदर्शनास आणून देण्‍याच्‍या उद्देशाने संतप्‍त ग्रामस्थांनी सोमवारी (ता.४) सकाळी 8.30 वाजल्यापासून कणकुंबी येथे ‘रास्ता रोको’ आंदोलन केले.
यावेळी नागरिकांचा रुद्रावतार पाहून खानापूर तालुक्याचे तहसीलदार प्रकाश गायकवाड, सार्वजनिक बांधकाम खात्याचे अधिकारी व रस्त्याचे कंत्राटदार यांनी मंगळवारपासून (ता.५) रस्तादुरुस्तीच्या कामाची सुरवात करण्याचे आश्‍वासन दिले. त्यानंतर ग्रामस्थांनी दुपारी १.३० वा.च्या सुमारास आंदोलन मागे घेतले.
या रस्त्याच्या कामाची निविदा काढलेली असतानाही त्‍याकडे कर्नाटक सरकारने दुर्लक्ष केल्‍यामुळे झालेल्या अपघातांत अनेकांना जीव गमवावा लागला आहे, तर कित्‍येकजण जायबंदी झालेले आहेत.
कणकुंबी, पारवाड, आमटे पंचायत क्षेत्रातील पंचायतींचे सरपंच, पंच व ग्रामस्थ रस्त्यावर उतरले होते. तसेच जर मंगळवारपासून कामाला सुरवात झाली नाही तर पुन्हा शुक्रवारपासून ‘रास्ता रोको’ करण्याचा इशारा दिला.
चोर्लाघाटाची स्थिती...
मागील दोन वर्षांपासून रस्त्याची दुरवस्था.
खड्ड्यांमुळे वाहन चालविणे होतेय कठीण.
गोव्यातून बेळगावला जाण्‍या-येण्यासाठी सुकर मार्ग.
रस्‍तादुरुस्‍तीसाठी कर्नाटककडून ३ कोटींची निविदा मंजूर.
वाहतूक कोंडीने झाली पंचाईत
गोव्यातून बेळगावला तसेच बेळगावहून गोव्यात येण्यासाठी अनमोड घाटापेक्षा चोर्लाघाट सुलभ व जवळचा मार्ग असल्याने अनेक वाहनचालक या रस्त्याला पसंती देतात. साहजिकच या मार्गावर मोठ्या प्रमाणात वाहनांची वर्दळ असते.
परंतु सोमवार सकाळपासून सुरू झालेल्या आंदोलनामुळे या वाहनचालकांची पंचाईत झाली. कणकुंबी बसस्थानकापासून दोन्ही बाजूला सात-आठ किलोमीटर अंतरावर वाहनांच्या रांगा लागल्या होत्‍या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
