Mapusa Meditation Camp : ब्रह्माकुमारीतर्फे उद्यापासून ध्यान शिबिर

म्हापसा : प्रजापती ब्रह्माकुमारी आंतरराष्ट्रीय विश्व विद्यालय मुख्यालयातील खाद्य विभागाचे व्यवस्थापक सूरज भाईजी हे येत्या रविवार 21 ते गुरुवार 25 मे दरम्यान गोवा दौऱ्यावर येणार आहेत. म्हापशात त्यांचे ध्यान शिबिर व लोकसंवादाचा कार्यक्रम होणार असल्याची माहिती गोवा-सिंधुदुर्ग विभागाच्या संचालिका शोभा बहनजी यांनी दिली.

शुक्रवारी येथील ब्रह्माकुमारीच्या कार्यालयात आयोजित पत्रकार परिषदेत त्यांच्या समवेत सुरेखा बहनजी या उपस्थित होत्या. या दौऱ्यावर सूरज भाईजी यांच्या सोबत ब्रह्माकुमारीच्या लेखिका व वक्त्या गीता बहनजी असेल.

गोवा दौऱ्यापूर्वी 21 रोजी सकाळी सूरज भाईजी वेंगुर्ला येथे ब्रह्माकुमारीच्या सुखसमाधान या कार्यालयाचे उद्‍घाटन करतील. त्यावेळी तेथील मंत्री, आमदार, नगराराध्यक्ष व प्रतिष्ठित लोक उपस्थित असतील. उद्‍घाटन सोहळ्यानंतर तेथे त्यांचा मेडीटेशनचा कार्यक्रम होईल.

त्यानंतर रात्री सूरज भाईजी त्यांचे गोव्यात आगमन होईल. सोमवार दि. 22 रोजी म्हापशातील कार्यालयात पहाटे 4 ते 4.45 दरम्यान त्यांचे मेडीटेशनचा कार्यक्रम होईल. सकाळी 10 ते सायंकाळी 5 पर्यंत ध्यान शिबिर होईल. 23 रोजी पहाटे 4 पासून ध्यानचा कार्यक्रम वेर्ला-बार्देश येथील कार्यालयात होईल.

संध्याकाळी ५ ते 7.30 वा. म्हापशातील हनुमान नाट्यगृहात ब्रह्माकुमारीच्या सकारात्मक परिवर्तन उपक्रमाअंतर्गत सूरज भाईजींचा लोकसंवादाचा कार्यक्रम असेल. या कार्यक्रमात सहभागी होण्यासाठी मुख्यमंत्री डॉ. प्रमोद सावंत व इतर मंत्रीगणांना निमंत्रण देण्यात आले आहे. त्यांची उपस्थिती अपेक्षित आहे, तसेच हा कार्यक्रम सर्वांसाठी खुला आहे, अशी माहिती शाभा बहनजी यांनी दिली.

24 रोजी ब्रह्माकुमारीच्या प्रमुखांसाठी ध्यानचे शिबिर सूरज भाई व गीता बहनजी घेतील. त्यानंतर गुरूवार 25 रोजी ते माघारी आबूधाबीला रवाना होतील, असेही शोभा बहनजी यांनी सांगितले.पाण्याच्या नियोजनाविषयी जनजागृती व आवश्यक उपक्रम या अभियानामार्फत हाती घेतले जाईल. सकारात्मक परिवर्तन या ब्रीदवाक्याच्या माध्यमातून हे उपक्रम राबवले जात आहे, अशी माहितीही शोभा बहनजी यांनी दिली.