Goa Traffic: अधिवेशनाच्या कामकाजासाठी मंत्र्यांनी एक तास अगोदर यावे, वीजमंत्र्यांनी दिल्या सूचना

Goa Traffic सध्या राजधानी पणजीत ‘स्मार्ट सिटी’अंतर्गत तसेच जी-20 परिषद बैठकांच्‍या पूर्वतयारीसाठी मोठ्या प्रमाणात रस्त्यांचे डांबरीकरण आणि इतर कामे सुरू आहेत.

वाहनचालकांना येजा करण्यासाठी अटल सेतू हा महत्त्वाचा दुवा ठरला आहे. परंतु या पुलावर दोन्ही बाजूंनी डांबरीकरणाचे काम सुरू असल्याने मोठ्या प्रमाणात वाहतूक कोंडी होत आहे.

याच पार्श्वभूमीवर वीजमंत्री सुदिन ढवळीकर यांनी सर्व मंत्री, आमदारांउद्देशून एक सूचना केलीय. सध्या पणजीत होणाऱ्या प्रचंड वाहतूक कोंडीमुळे विधानसभेच्या कामकाजाच्या एक तास अगोदर सर्व मंत्री, आमदार आणि अधिकाऱ्यांनी उपस्थित राहावे.

ही वाहतूक कोंडी सोडवण्यासाठी सरकार प्रयत्नशील असून पर्वरी येथील सिग्नल सिस्टीम अधिक सुयोग्यरीत्या राबवण्यात येणार असल्याचे ढवळीकर यांनी सांगितले.

सध्या नव्या पाटो पुलावर डांबरीकरण सुरू आहे. तसेच अटल सेतूवरही दोन्ही बाजूला रस्‍ता डांबरीकरण करण्‍यात येत असल्‍याने मोठ्या प्रमाणात वाहतूक कोंडी होत आहे. अटल सेतू, दिवजा सर्कल, मांडवी पूल, पर्वरी सिग्नल आदी सर्वच ढिकाणी भर दुपारी उन्हाच्या झळा सहन करत तासन्‌तास वाहतूक कोंडीत लोक अडकून पडत आहेत.

 रात्री 10 नंतरही पणजी व पर्वरी परिसरात मोठ्या प्रमाणात वाहतूक कोंडीचा त्रास नागरिकांना सहन करावा लागतोय. त्यामुळे पणजीत येण्याऱ्या लोकांना आता दहावेळा विचार करूनच यावे लागेल असे दिसते.