Mobor coast: मोबोर समुद्रकिनाऱ्याची धूप; केळशी पंचायतीने वेधले लक्ष

Mobor coast: केंद्रीय पर्यावरण, वन व हवामान बदल राज्यमंत्री भूपेंद्र यादव हे गोव्यात आले असताना केळशी पंचायतीचे सरपंच डिक्सन वाझ, पंचसदस्य जेसूस डिकॉस्ता यांनी त्यांची भेट घेऊन मोबोर समुद्रकिनाऱ्याची धूप होतेय त्याकडे त्यांचे लक्ष वेधले. या भेटीच्या वेळी मुख्यमंत्री डॉ. प्रमोद सावंत, राज्य पर्यावरण मंत्री नीलेश काब्रालही उपस्थित होते.

या वेळी सरपंचांनी किनाऱ्याची धूप संदर्भात एक निवेदन केंद्रीय मंत्र्यांना दिले. ही धूप थांबविण्यासाठी उपाययोजना करावी, अशी विनंती निवेदनात करण्यात आली आहे.

गेल्या काही आठवड्यांपासून किनाऱ्याची धूप होत असल्याचे स्थानिकांच्या लक्षात आले. तसेच किनाऱ्यावर जाण्यासाठी काळ्या दगडाची जी पायवाट केली होती तीसुद्धा ढासळली असून दगड सर्वत्र पसरलेले दिसत आहेत.

केंद्र सरकारने राज्य सरकारच्या मदतीने येथील किनाऱ्याची धूप थांबविण्यासाठी उपाययोजना करावी. जर अशीच धूप यापुढेही होत राहिली तर समुद्रकिनाऱ्यानजीक असलेली स्थानिकांची घरे नष्ट होण्याची भीती आहे. जे परिसरातील झाडे कापून त्यांना आग लावतात त्यांच्यावर कडक कारवाई करावी, अशी विनंती निवेदनात केली आहे.- डिक्सन वाझ, सरपंच