Goa Governor: कोंकणी नवलेखकांना संधी! राजभवन साहित्यिकांना करणार 'ही' मदत...

Goa Governor: गोव्याची राज्यभाषा असलेल्या कोंकणी भाषेत लिहिणाऱ्या साहित्यिकांना आता राजभवन प्रोत्साहन देणार आहे. त्यासाठी कोंकणी भाषेत लिहिणाऱ्या नवलेखकांना मदत केली जाणार आहे. राज्यपाल पी. एस. श्रीधरन यांनी ही माहिती दिली.

राज्यपाल श्रीधरन म्हणाले की, राजभवन कोंकणी भाषेत लिहिणाऱ्या २५ नव लेखकांना प्रोत्साहन देणार आहे. त्यांची पुस्तके प्रकाशित केली जातील. ज्या नवलेखकांनी अद्याप त्यांचे पुस्तक प्रकाशित केलेले नाही, अशा साहित्यिकांनी पुढे येऊन आपले प्रपोजल राजभवनकडे द्यावे.

कोंकणी भाषेतील तज्ज्ञांकडून हा अर्जांची छाननी केली जाईल. त्यानंतर पुस्तक प्रकाशनाबाबत निर्णय घेण्यात येणार आहे. राजभवनतर्फे लवकरच याबाबत घोषणा करण्यात येणार आहे.

दरम्यान, गतवर्षी मुख्यमंत्री डॉ. प्रमोद सावंत यांनी गोव्यात उच्च न्यायालयाच्या कामकाजात इंग्रजीसोबत कोकणीचा वापर व्हावा, यासाठी प्रयत्न करणार असल्याचे सांगितले होते. गोव्यातील जनतेवर चार भाषांचा प्रभाव असल्याचं मुख्यमंत्र्यांनी म्हटले होते.

आम्ही बोलतो कोकणी, वर्तमानपत्रं मराठीतील वाचतो, चित्रपट हिंदी बघतो आणि लिहितो इंग्रजीत असे सांगत आता राजभाषा कोकणीला सरकारदफ्तरी न्याय मिळवून देण्यासाठी प्रयत्न सुरु केल्याचे त्यांनी म्हटले होते.