'फोंडा गोव्यातील तिसरा जिल्हा होणार'

फोंडा : फोंडा लवकरच गोव्यातील तिसरा जिल्हा होणार आहे, असं वक्तव्य गोव्याचे माजी मुख्यमंत्री आणि फोंड्याचे आमदार रवी नाईक यांनी केलं आहे. मुख्यमंत्री डॉ. प्रमोद सावंत यांनी आपल्याला तसं आश्वासन दिल्याचंही त्यांनी म्हटलं आहे. फोंडा परिसरातील नागरिकांना याचा मोठा फायदा होणार असल्याचंही त्यांनी स्पष्ट केलं आहे. (Ravi Naik News Updates)

रवी नाईक यांनी बुधवारी पत्रकारांशी संवाद साधला. यावेळी त्यांनी विविध विषयावर भाष्य केलं. गोवा विधानसभा निवडणूक, खाणप्रश्न, मायकल लोबो काँग्रेसप्रवेश, फोंडा (Ponda) जिल्हा आदी विषयांवर आपलं मत व्यक्त केलं. फोंडा जिल्हा झाल्यास त्याचा फायदा परिसरातील नागरिकांना होणार आहे. गरीब नागरिकांना जिल्ह्याच्या ठिकाणी कामासाठी जाण्यास मोठी अडचण होते. फोंडा तिसरा जिल्हा झाल्यास प्रशासनाचा ताण कमी होणार असल्याचंही त्यांनी सांगितलं आहे,

दरम्यान भाजप आगामी विधानसभा (Goa Assembly Election) निवडणुकीत 40 पैकी 27 जागा मिळवेल, असा अंदाजही त्यांनी व्यक्त केला. पंतप्रधान नरेंद्र मोदींच्या नेतृत्त्वामध्ये भाजप गोव्यात जोरदार मुसंडी मारेल. त्यामुळे भाजप सोडून गेलेल्या लोकांमुळे पक्षाला कोणताही धोका नाही. उलट फायदाच असल्याचं त्यांनी सांगितलं. खाण पट्ट्यात असलेल्या नाराजीवर पत्रकारांनी विचारलेल्या प्रश्नाला उत्तर देताना रवी नाईक म्हणाले, की खाण अवलंबितांमध्ये कोणतीही नाराजी नाही. ते येत्या निवडणुकीत भाजपच्याच (BJP) बाजूने उभे राहतील.