Agriculture Education : ‘सीटीएन’च्या विद्यार्थ्यांनी शिकली भाताची कथा

Cuncolim : येथील श्रीमती चंद्रभागा तुकोबा नाईक शाळेच्या मुलांना मातीशी जोडून पृथ्वीच्या उदरातून पीक कसे तयार होते याची माहिती व जाण करून देण्याचा खास उपक्रम सुरू केला आहे. या उपक्रमाचा शुभारंभ प्राथमिक शाळेतील मुलांना प्रत्यक्ष शेतात नेऊन भात पीक कशी तयार होते याची माहिती करून दिली.

काकोडा येथील एक प्रगतिशील महिला शेतकरी क्रिस्टालिन कार्व्हालो यांच्या शेतात मुलांनी भात शेतीच्या लागवडीचे प्रात्यक्षिक अनुभवले. महिला शेतकरी क्रिस्टालिन यांनी मुलांना भात शेतीची लागवड कशी होते व पूर्वी पारंपरिक पद्धतीने कशी होत होती याची माहिती करून दिली.

शेतीची मशागत, तरवा घालणे, नागरणी, पेरणी, नडणी, खत पाणी देणे, कापणी, मळणी, भाताला वारा देणे, भात उकडणे इथपासून तांदूळ करणे व तांदळापासून भात तयार होण्यापर्यंतची सगळी कथा त्या शेतकरी महिलेने मुलांना सांगितली. मुख्याध्यापक विजयकुमार कोप्रे यांनी मुलांना गोव्यात भातशेती कशी घेतली जाते, आज नवीन आधुनिक पद्धतीने शेती कशी केली जाते व शेती का गरजेची आहे याबद्दल मुलाना मार्गदर्शन केले. यावेळी विराज नाईक, यश नाईक परेश व योगिता नाईक यांनीही मुलांना शेतीबद्दलची माहिती दिली.

पालकांकडून शिक्षकांचे कौतुक

नवीन शिक्षण धोरणात अशा प्रकारचे शिक्षण देण्यावर भर दिला असून सिटीएन शाळेने एक पाऊल पुढे टाकून अशा पद्धतीचे उपक्रम हाती घेतल्याबद्दल पालकांनी शिक्षकांचे कौतुक केले आहे.

मुलांनी घेतले पेरणीचे धडे

दुसरी, तिसरी व चौथीच्या मुलांनी या अनोख्या उपक्रमाचा पुरेपूर आनंद घेतला. मुलांनी प्रत्यक्ष मातीत हात घालून पेरणी कशी करतात याचे धडे घेतले. यावेळी शिक्षिका दीपा देसाई, सुषमा बुक्कम, निशा गोरे, प्रिया बुक्कम यांनी मुलांना शेतीचे महत्त्व व अन्नाचा सन्मान यावर मार्गदर्शन केले.