CM Pramod Sawant: पर्यटकांसोबत गैरवर्तन कराल तर याद राखा; कडक कारवाई

CM Pramod Sawant हणजूण येथे पर्यटक कुटुंबीयावरील प्राणघातक हल्ला आणि पोलिसांचा निष्काळजीपणा यावरून राज्याची देशभरात बदनामी होत असल्याने अखेर मुख्यमंत्री डॉ. प्रमोद सावंत यांना याप्रकरणी आढावा बैठक घेऊन ठोस कारवाई करावी लागली.

चुकीचा गुन्हा नोंद केलेल्या हणजूणचे पोलिस उपनिरीक्षक फ्रान्‍सिस्को झेविअर यांच्यावर आज संध्याकाळी निलंबनाची कारवाई झाली. ‘पर्यटकांसाठी गोवा सुरक्षित असून त्यांच्याशी गैरवर्तन करणाऱ्यांची गय केली जाणार नाही; तसेच पर्यटकांनीही कायदे पाळावेत’, अशी इशारावजा सूचना त्‍यांनी केली.

व्हायरल व्हिडिओमुळे गोव्याच्या पर्यटनाला धक्का बसल्याने या पार्श्‍वभूमीवर मुख्यमंत्र्यांनी आज पोलिस मुख्यालयात गृह, मजूर व पर्यटन खात्याच्या अधिकाऱ्यांची बैठक घेतली. यानंतर माध्यमांना त्यांनी सांगितले, की या घटनेची पूर्ण चौकशीअंती हल्लेखोराविरुद्ध खुनाचा प्रयत्न केल्याचा गुन्हा दाखल करून चौघांना अटक झाली आहे.

त्‍यांना आठ दिवसांची पोलिस कोठडी देण्‍यात आली. पर्यटनपूरक व्यावसायिकांना अशा घटना रोखण्यासाठी संवेदनशील करण्याची गरज आहे. राज्यात बेकायदेशीरपणे व्यवसाय व हस्तक्षेप करणाऱ्यांविरुद्ध तसेच कायदा हातात घेणाऱ्या स्थानिक किंवा पर्यटकांची गय केली जाणार नाही.

मुख्यमंत्री काय म्हणाले?

1) हणजूण येथी प्रकरणात अधिकाऱ्याने कलम ३२४ ऐवजी ३०७ लागू करायला हवे होते. पर्यटक व वेटर यांच्यातील किरकोळ बाचाबाचीनंतर रिसॉर्ट व्यवस्थापकाने हस्तक्षेप केला नाही.

2) त्याचवेळी हा हस्तक्षेप झाला असता हे प्रकरण रोखता आले असते. त्यामुळे रिसॉर्टच्या व्यवस्थापकाचीही पोलिस चौकशी करणार आहेत.

3) पर्यटकांकडून काहीवेळा चुका होतात. अशावेळी तेथील संबंधित रिसॉर्ट व्यवस्थापनाकडून त्या संवेदनशील व योग्य पद्धतशीरपणे हाताळण्याची गरज आहे.

4) हॉटेलमधील परप्रांतीय मजुरांची कामगार खात्यामार्फत तसेच पोलिसांकडून तपासणी करून त्यांची पार्श्वभूमी जाणून घेणे आवश्‍यक आहे.

दोन्ही घटकांना सुनावले खडे बोल-

पर्यटन व्‍यवसाय वाढावा यासाठी सरकारने हॉटेल व्‍यावसायिकांना साह्य केले आहे. अनधिकृत हॉटेल व्‍यवसाय चालत असतील तर संबंधितांनी कायद्याच्‍या कक्षेत यावे. अधिकृत व्‍यावसायिकांना सर्व प्रकारच्‍या सुविधा, पोलिस संरक्षण पुरवले जाईल.

गोव्‍यात पर्यटकांचे स्‍वागत आहे. त्‍यांनीही नियम, कायद्याचे पालक करणे आवश्‍‍यक आहे. जुवे गोवे येथे पर्यटकांकडून सुरक्षा रक्षकाला झालेली मारहाण योग्‍य नाही. असे प्रकार घडू नयेत.

किनारपट्टी भागातून हायप्रोफाईल हॉटेल्स व रेस्टॉरंट्स मालकांकडून खंडणीवसुली केली जात असल्याची माहिती आमदार मायकल लोबो यांच्याकडे असल्यास त्यांनी लेखी तक्रार पोलिसांकडे द्यावी.

कोणत्या हॉटेल्समध्ये या खंडणीवसुलीदारांनी बैठक बोलावली होती? तेथे कोण आले होते? याची माहिती माझ्याकडे द्यावी. संबंधितांना अटक केली होईल. कोणत्याही तक्रारीविना विधाने करून गोव्याचे नाव बदनाम करू नये.

- डॉ. प्रमोद सावंत, मुख्यमंत्री