वीज दरवाढ मागे घ्या; अन्यथा वीज कार्यालयात घेराव : गोवा फॉरवर्डचा इशारा

मडगाव : गोव्यात वीज खात्याने जी बिलात दरवाढ केली आहे आहे ती त्वरित मागे घ्यावी अन्यथा लोकांना महागाईच्या खाईतून बाहेर काढण्यासाठी गोवा फॉरवर्डला वीज कार्यालयावर मोर्चा आणून अधिकाऱ्यांना घेराव घालावा लागेल असा इशारा गोवा फॉरवर्डच्या उपाध्यक्ष ऍड. अष्मा सय्यद यांनी दिला आहे. (Goa Electricity Price Hike)

वीज खात्याने प्रति युनिट 5 ते 8 पैसे दरवाढ केली आहे. मागच्या 3 महिन्यातील ही दुसरी दरवाढ आहे. आधीच लोक कोविड महामारीमुळे पिचले आहेत. त्यांचा आर्थिक स्तर कमी झालेला आहे. अशात ही दरवाढ म्हणजे त्यांचे कंबरडे मोडून घालण्याचा प्रकार अशी टीका त्यांनी केली आहे.

सध्याच्या दरवाढीमुळे विजेचे बिल दरमहा तीन ते चार हजारांच्या घरात पोहोचलेले असून 15 ते 20 हजार पगार असलेल्या पगारदाराना हे बिल भरणे अशक्य होणार आहे. अशी दरवाढ करून सरकारने गरिबांच्या पैशांवर स्वतःचा फायदा करून घेऊ नये असा सल्ला देत या प्रकारात मुख्यमंत्र्यांनी स्वतः लक्ष घालून ही दरवाढ त्वरित मागे घ्यावी अशी मागणी त्यानी केली आहे.