'सावर्डेतील रस्‍ते करणार गुळगुळीत'

पिसुर्ले: सत्तरी तालुक्यातील सावर्डे पंचायत क्षेत्रातील सर्व रस्त्यांचे हॉटमिक्स डांबरीकरण करण्यात येणार आहे. जवळपास 12 किलोमीटर रस्त्याच्‍या या कामावर सुमारे 2 कोटी 30 लाख रुपये खर्च करण्यात येणार आहे. या कामाचा शुभारंभ स्थानिक आमदार तथा मंत्री विश्वजीत राणे यांच्या हस्ते करण्यात आला. यावेळी वाळपई सार्वजनिक बांधकाम खात्याच्या रस्ता विभागाचे साहाय्यक अभियंता देवेंद्र वेलिंगकर व ग्रामस्‍थांची उपस्‍थिती होती. आमदार विश्‍वजीत राणे यांनी खास प्रयत्न करून या कामाचा सातत्याने पाठपुरावा केला होता. यामुळेच सावर्डे पंचायत क्षेत्रातील सुमारे 12 किमी रस्त्याचे डांबरीकरण करण्यात येणार आहे. यासंदर्भात प्रस्ताव सरकारला सादर करण्यात आला होता. या पंचायत क्षेत्रातील अनेक ठिकाणी रस्ता खराब झाला होता.

त्यामुळे सदर ठिकाणी हॉटमिक्स डांबरीकरण करण्यात यावे अशा प्रकारची मागणी सातत्याने नागरिकांकडून करण्यात येत होती. सावर्डे पंचायतीतर्फे या संदर्भाचा ठराव मंजूर करून तो पुढील कारवाईसाठी पाठविण्यात आला होता. प्रस्ताव सरकारला सादर करण्यात आल्यानंतर त्याला मंजुरी मिळाली व आजपासून या कामाला सुरुवात झालेली आहे. दरम्‍यान, वाळपई मतदारसंघात चार ग्रामपंचायती व एका नगरपालिकेचा समावेश आहे.

पंधरा दिवसांत काम होणार पूर्ण!

सावर्डेचे सरपंच अशोक च्‍यारी म्‍हणाले की, गेल्या अनेक दिवसांपासून सातत्याने नागरिकांकडून या रस्त्याचे डांबरीकरण करण्यात यावे अशा प्रकारची मागणी करण्यात येत होती. त्याला अखेर मंजुरी मिळाली व आजपासून प्रत्‍यक्षात कामाला प्रारंभ झाला. पंधरा दिवसांमध्ये सदर डांबरीकरण पूर्ण होणार असून त्यानंतर सावर्डे पंचायत क्षेत्रातील खराब रस्त्यांची समस्‍या मार्गी लागणार आहे.