स्पाईस जेटचे 'सी प्लेन' चे पर्यटनाच्या नकाशावर गोव्याला स्थान देण्यासाठी प्रयत्न

पणजी: महिनाभरात दुसऱ्यांदा स्पाईस जेटचे सी प्लेन मांडवी नदीत उतरले. देशभरातील ‘सी प्लेन’ पर्यटनाच्या नकाशावर गोव्याला स्थान देण्यासाठी प्रयत्न करण्यात येत आहेत. त्यासाठी पाण्यात उतरविण्याच्या विमानांसाठी मांडवी नदी किती सुरक्षित आहे याची चाचणी करण्यात येत आहे.

हे विमान दुपारी मांडवी नदीत उतरल्यानंतर ते जुन्या सचिवालय इमारतीसमोरील धक्क्याशेजारी उभे होते. ते पाहण्यासाठी धक्क्‍यालगत पर्यटकांनी गर्दी केली होती. तेथून जाणारेही वाहनांचा वेग मंदावत मान वळवून विमान पाहत होते. सुरवातीला तेथे एखादी नौका नांगरून ठेवली की काय असे दुरून वाटत होते.

महाराष्ट्रातील काही पर्यटन ठिकाणांच्या ठिकाणी अशी विमाने उतरवण्याचा सराव करण्यात आला आहे. गुजरातेत अशी विमाने उतरवण्यात येतात. ही सारी पर्यटन स्थळे अशा पाण्यातील हवाई मार्गाने जोडण्याचा प्रयत्न सरकारी पातळीवर केला जात आहे. देशाच्या इतर भागातील पर्यटन स्थळी असलेले पर्यटक या माध्यमातून थेटपणे गोव्यात येण्याचे नियोजन करण्यात येत आहे. केंद्रीय हवाई वाहतूक मंत्रालय आणि केंद्रीय हवाई वाहतूक सुरक्षा महासंचालनालयाच्या परवानगीनंतरच ही सेवा सुरु होणार आहे. यात पर्यटन खात्याची भूमिका नेमकी काय असेल हे अद्याप समजलेले नाही.