आदर्श संसदेचे सहावे अधिवेशन उत्साहात

पणजी : उत्तान, ठाणे येथील इंडियन इन्स्टिट्यूट ऑफ डेमॉक्रेटिक लिडरशीप (आयआयडीएल) यांचे आदर्श संसदेचे सहावे अधिवेशन 17 आणि 18 मे या कालावधीत आरएमपी-केईसी संकुलात उत्साहात पार पडले. या अधिवेशनात हुजुराबादचे आमदार आणि तेलंगणचे माजी वित्तमंत्री ईटाला राजिंदर व उत्तर गोवा जिल्हा पंचायतीचे अध्यक्ष सिध्देश नाईक यांचा वक्ते म्हणून सहभाग होता.

या अधिवेशनात आयआयडीएलचे पदव्युत्तर कार्यक्रमाचे एकूण 30 विद्यार्थी सहभागी झाले होते. त्यांना सत्ताधारी व विरोधी अशा गटात विभागण्यात आले होते आणि त्या भूमिकांना अनुसरून त्यांनी वादविवादात योगदान दिले.

वादविवाद आणि वक्तृत्व या माध्यमातून त्यांनी अस्सल संसदेचे वातावरण निर्माण केले. अधिवेशनाच्या सत्रात नवीन सदस्यांना शपथ देणे, प्रश्‍नोत्तरीचा तास, लक्षवेधी ठराव मांडणे, विधेयके मांडणे असे कामकाज झाले.

अधिवेशनात अलीगडचे हरीगड असे नामांतर करणे आणि मणिपूरमधील दंगली या मुद्द्यांवर लक्षवेधी ठराव मांडण्यात आले. तसेच तीन महत्वाची विधेयके मांडण्यात आली. त्यात राष्ट्रीय नागरीक नोंदणी (एनआरसी), दुसरे वित्त विधेयक होते व तिसरे संसदेत युवकांना 33 टक्के आरक्षण अशा विधेयकांचा समावेश होता. अलीगड नामांतर आणि एनआरसी या ठरावांवर जोरदार युक्तीवाद करण्यात आले.

आदर्श संसदेचे अध्यक्षस्थान भूषविताना आपल्याला आनंद झाला. यावेळी विद्यार्थ्यांनी चर्चेत सहभागी होऊन केलेले युक्तीवाद प्रशंसनीय होते. या अधिवेशनातून आपल्यालाही काही गोष्टी अनुभवता आल्या. -सिद्धेश नाईक, अध्यक्ष-उत्तर गोवा जिल्हा पंचायत

आयआयडीएल ही एक आगळी अशी संस्था आहे आणि येथे युवकांमध्ये लोकशाही मूल्ये बिंबवली जातात. येथील आदर्श संसदेच्या माध्यमातून युवकांना संसदीय कामकाजाचा प्रत्यक्ष अनुभव देण्यात येतो.

-देवेंद्र पै ,आयआयडीएलचे अभ्यासक्रम संचालक