What Next After 10th: विद्यार्थ्यांच्या आवडी-निवडीचाही विचार व्हावा !

What Next After 10th पैसा मिळवण्यापेक्षा ज्ञान मिळवणे, हे शिक्षणाचे अंतिम ध्येय असले पाहिजे. यात विद्यार्थी केंद्रबिंदू असतो. मात्र, महत्त्वाकांक्षी पालकांच्या हट्टी धोरणामुळे विद्यार्थ्यांच्या आवडी-निवडी आणि कला-गुणांकडे दुर्लक्ष होत असून त्याचा अंतिम परिणाम ज्ञानार्जनावर होत आहे.

यासाठीच अकरावीत प्रवेश घेताना विद्यार्थ्यांच्या आवडी-निवडीचा विचार व्हावा, असे मत शिक्षण तज्ज्ञांनी व्यक्त केले आहे.

इयत्ता दहावी शनिवारी निकाल जाहीर झाला. यात19288 विद्यार्थी उत्तीर्ण झाले असून काही विद्यार्थ्यांना एटीकेटी मिळाली आहे. या आधारे ते अकरावीत प्रवेश मिळवू शकतात. उद्या, सोमवारपासून माहिती पुस्तिका मिळवून अकरावीत प्रवेशही घेता येणार आहे.

विद्यार्थ्यांचा कल जाणून घ्या! : ज्येष्ठ शिक्षण तज्ज्ञ कालिदास मराठे म्हणाले की, शिक्षण हे गुणवत्तेचा शोध घेणारे असावे. मात्र, पालकांच्या आवडी-निवडीलाच जास्त महत्त्व दिले जाते.

साहजिकच पाल्याच्या शिक्षणावर चांगला आणि वाईट परिणाम होतो. म्हणून अनेक मुले संबंधित विद्या शाखा सोडून दुसरी विद्या शाखा निवडतात. त्यामुळे विद्यार्थ्याचा कल जाणून घ्यावा.

नव्या विद्या शाखांचा अवलंब करा!

शिक्षण तज्ज्ञ पांडुरंग नाडकर्णी म्हणाले, पूर्वी जास्त पैसे मिळवण्यासाठी वैद्यकीय आणि अभियांत्रिकी क्षेत्राची निवड केली जायची.

आता शिक्षणाचा हा फंडा मागे पडत असून नाट्य, साहित्य, पेंटींग, डिझाईन, आदरातिथ्य शाखाही तितक्याच महत्त्वाच्या बनल्या असून त्या आपल्या आवडी-निवडीसह उत्तम पैसे मिळवून देतात. त्यामुळे पालक आणि विद्यार्थ्यांनी नव्या विद्या शाखांचाही विचार करणे गरजेचे आहे, असे ते म्हणाले.