Fire In Goa: कुठ्ठाळी नावतातील आग अजूनही धुमसतेय, नौदलाकडून शर्थीचे प्रयत्न

Fire In Goa कुठ्ठाळी नावता येथे डोंगराळ भागात आग लागल्याची घटना काल रात्री घडली असून अग्निशमन दल तसेच नौदलाकडून आग विझविण्यास अथक परीश्रम चालू आहे. डोंगराळ भाग असल्याने अग्निशमन दलाला अडचणीचा सामना करावा लागत असल्याने नौदलाची मदत घेणे भाग पाडले.

या ठिकाणी दाट झाडी असल्यामुळे अग्निशमनचे वाहन घटनास्थळी पोहोचण्यात अडचणी आल्यामुळे बुधवारी सकाळपासून नौदलाच्या हेलिकॉप्टरद्वारे पाणी फवारले जात आहे. बुधवारी दुपारी अग्निशमन दलाच्या मदतीसाठी एका व्यवस्थापनाने आपले 50 कामगार दिले.

राज्यात आग लागण्याच्या घटनेत प्रचंड वाढ झाली असून आगीच्या घटनांमध्ये दिवसेंदिवस वाढ होत असून असून मागील चार पाच दिवसात 20 हून अधिक ठिकाणी आग लागल्याच्या घटना घडल्या आहेत. यात दुकाने, फॅक्टरी, जंगल, आंबा-काजू बागा यासह मोकळ्या माळरानावर आग लागण्याची घटना घडत आहेत.

मुरगाव तालुक्यातील कुठ्ठाळी नावता येथे डोंगराळ भागात आग लागल्याची घटना काल रात्री घडली. ही आग काल रात्री लागल्याचे उघडकीस आली असता अग्निशामक दलाच्या जवानांनी घटनास्थळी धाव घेऊन आग लागल्याच्या ठिकाणी जाण्याचा प्रयत्न केला असता डोंगराळ भाग असल्याने त्यांना अडचणीचा सामना करावा लागला. त्यांनी मिळेल तिथे आग विझविण्याचा प्रयत्न केला. मात्र त्यांना आगीवर नियंत्रण मिळवता आले नाही.

याची माहिती कुठ्ठाळीचे आमदार आंतोनियो वास यांना मिळल्यानंतर त्यांनी घटनास्थळी धाव घेतली व परिस्थितीचा आढावा घेतला व त्यांनी नौदलाला याची माहीती दिली असता नौदलाच्या हेलीकॉप्टरद्वारे फेऱ्या मारून पाण्याचे फवारे मारण्यात आले. घटनास्थळी उपजिल्हाधिकारी, मामलेदार व संबंधीत अधिकाऱ्यांनी धाव घेऊन परिस्थितीचा आढावा घेतला.

दरम्यान आजही आग नियंत्रणात आली नसल्याने पेचप्रसंग निर्माण झाला आहे. अग्निशमन दलाकडून तसेच नौदलाकडून आग विझविण्यास अथक परिश्रम चालू आहेत. या ठिकाणी दाट झाडी असल्यामुळे अग्निशमनचे वाहन घटनास्थळी पोहोचण्यात अडचणी आल्यामुळे बुधवारी सकाळपासून नौदलाच्या हेलिकॉप्टरद्वारे पाणी फवारले जात आहे. बुधवारी दुपारी अग्निशमन दलाच्या मदतीसाठी एका व्यवस्थापनाने आपले 50 कामगार दिले.