Goa Fire: खाण डंपवरील जंगल भडकले

साखळीतील शिगमोत्सवात मुख्यमंत्री डॉ. प्रमोद सावंत यांनी जंगलांना आग लावण्याचे प्रकार थांबविण्याचे आवाहन केल्यानंतर काही क्षणातच कुडणे-सोनशी येथील खाण डंपवरील जंगलात आग भडकल्याची माहिती समोर आली. आगीने रौद्ररूप धारण केल्याने ती आटोक्यात आणण्याचे सर्व प्रयत्न विफल ठरले. त्यामुळे अग्निशामक दलाच्या जवानांना मागे फिरावे लागले.

दरम्यान, आगीचे स्वरूप पाहता ही आग रात्रीत आटोक्यात येणे कठीणच असल्याची चिन्हे दिसत आहेत. शनिवारी (ता.11) सकाळी अग्निशामक दलाचे जवान पुन्हा या भागात आगीवर नियंत्रण आणण्यासाठी प्रयत्न सुरू करणार आहेत.

होडा-सत्तरी येथील श्री देव आजोबा मंदिराच्या पुढे दिसणाऱ्या डोगरावर ही आग लागली आहे. एका खाण कंपनीच्या मालाच्या डंपवर निर्माण झालेल्या जंगलास रात्री आग लागल्याची माहिती अग्निशामक दलाला मिळाली. डिचोली येथील दोन्हीही बंब बचावकार्यात इतरत्र गेल्याने वाळपई येथील अग्निशामक दलाला ही माहिती देण्यात आली.

बचावकार्य करण्यात आल्या अडचणी

वाळपई अग्निशामक दलाचा बंब जवानांसह घटनास्थळी दाखल झाला खरा; परंतु त्या डोंगरावर जाण्यासाठी योग्य रस्ता नसल्याने तसेच रात्री सर्वत्र अंधार असल्याने बचावकार्य करणे कठीण बनले. तरीही दलाच्या जवानांनी प्रयत्न केले.

पण ते निष्फळ ठरल्यानंतर अग्निशामक दलाची गाडी माघारी फिरली. ही आग रात्रभर पेटतच राहण्याची भीती आहे. अग्निशामक दलाचा बंब शनिवारी सकाळी जाऊन आग आटोक्यात आणण्यासाठी प्रयत्न करणार आहे.