वास्‍कोतील सुरीहल्ला प्रकरणी तिघांना अटक

वास्को: वास्कोत बुधवारी रात्री तिघांकडून दोघा युवकांवर सुरीहल्ला करण्यात आला होता. हल्ला केलेल्यांमध्ये दोघा अल्पवयीन मुलांचा समावेश असून पोलिसांनी त्‍यांना अटक केली आहे. हा हल्ला पूर्ववैमनस्यातून झाला असण्याची शक्यता आहे. मोहम्मद रफिक सय्यद (24) व गौस निजामुद्दीन सय्यद (19) अशी जखमींची नावे आहेत.

(Three arrested in knife attack case in goa)

गोस याला गंभीर जखमा झाल्‍या आहेत.

मिळालेल्‍या माहितीनुसार, सुरी हल्ल्याची ही घटना बुधवारी रात्री एकच्या सुमारास शांतीनगर-वास्को भागात घडली. जखमी युवक मोहम्मद व गौस हे मित्र असून नवेवाडेतून ते एका नातेवाईकाच्या वाढदिवसाच्या कार्यक्रमात सहभागी होण्यासाठी शांतीनगरात आले होते. रात्री एकच्या सुमारास ते कार्यक्रम आटोपून घरी जात होते.

मात्र, हल्लेखोरांनी त्यांना वाटेतच अडवले व त्‍यांच्‍यावर सुरीहल्ला चढवला. मोहम्मदच्या हातावर तर गौस याच्या हातासह पोटावर, चेहऱ्यावर व शरीरावर इतर ठिकाणी जखमा झाल्‍या आहेत. त्याला गोमेकॉमध्ये दाखल करण्यात आले. दरम्‍यान, या प्रकरणी दोन अल्पवयीन मुलांसह तीन संशयित आरोपींना वास्को पोलिसांनी अटक केली आहे. वास्कोचे पोलिस उपअधीक्षक राजेश कुमार यांच्या मार्गदर्शनाखाली निरीक्षक कपिल नायक अधिक तपास करत आहेत.

शहरात ठिकठिकाणी नाकाबंदी सुरू

वाढत्या गुन्ह्यांना आळा घालण्यासाठी तसेच रस्त्यांवर मद्यपान करणाऱ्यांवर नजर ठेवण्यासाठी वास्को पोलिसांनी काल शुक्रवारी सायंकाळी वास्को व परिसरात कडक बंदोबस्त ठेवून नाकाबंदी केली. मांगूरहिल, नवेवाडे, साईनगर, शांतीनगर आदी परिसरात ही मोहीम राबवून येणाऱ्या-जाणाऱ्यांची झडती घेण्‍यात आली. अचानक घडलेल्‍या या प्रकारामुळे नागरिकांत मात्र संभ्रम निर्माण झाला.