Anjuna Goa : हणजूण येथे पर्यटक महिलेचा विनयभंग, संशयिताला बेड्या

योगेश मिराशी

Anjuna Goa : हणजूण येथे एका पर्यटक महिलेचा विनयभंग केल्याप्रकरणी हणजूण पोलिसांना संशयित टॅक्सी चालकास अटक केली. एसडीपीओ म्हापसा जिवबा दळवी यांच्या माहितीनुसार, काल मध्यरात्री मूळची चेन्नईची पर्यटक महिला ही दाबोळी विमानतळावर उतरली होती.

पीडित महिला त्यानंतर हणजूणपर्यंत शेअरिंग टॅक्सीत बसली. यावेळी वाटेत इतर प्रवासी हा पणजीत उतरला व ती पुढे हणजूणपर्यंत आली. मात्र, टॅक्सीतून खाली उतरत असताना, संशयित टॅक्सी चालकाने तिला पकडून तिचा विनयभंग केला. यावेळी पिडितेने संशयिताच्या तावडीतून सुटका करीत, तातडीने व्हिलामध्ये धाव घेतली आणि याबाबत तक्रार दिली.

तक्रार मिळताच, हणजूण पोलिसांनी जीए 06 टी 3258 या गाडीचा क्रमांक शोध घेत, सदर संशयित मिथुन श्रीकांत गौर (गुलबर्गा, कर्नाटक) यास अटक केली. संशयिताविरुद्ध 354 (अ) कलमान्वये गुन्हा नोंद झाला असून, तक्रार दाखल होताच दोन तासांमध्ये पोलीस निरीक्षक प्रशाल देसाई व उपनिरीक्षक साहिल वारंग यांनी या संशयितास अटक केली.