पणजीतील वाहतूक सिग्नल यंत्रणा ठप्प

पणजी : पणजी महानगरपालिकेने शहरातील चार मोक्याच्या ठिकाणी उभारलेली वाहतूक सिग्नल यंत्रणा अधूनमधून नादुरुस्त होण्याचे प्रकार घडत असतानाच गेला आठवडाभर ही यंत्रणा ठप्प झाल्याने सकाळी व संध्याकाळी या ठिकाणी वाहतुकीची कोंडी होऊन लांबच लांब रांगा लागत आहेत. या यंत्रणेमध्ये गंभीर बिघाड निर्माण झाला असल्याने दुरुस्ती करण्यास वाहतूक पोलिसांनी दुरुस्तीबाबत पत्र देऊनही पणजी महानगरपालिकेकडून दुर्लक्ष होत आहे.

पणजी शहरात दरदिवशी सुमारे 50 हजार वाहनांची ये - जा असते. त्यामुळे त्यावर नियंत्रण ठेवण्यासाठी प्रायोगिक तत्त्वावर पणजी महानगरपालिकेच्या साहाय्याने एल अँड टी कंपनीने सांतिनेझ, कला अकादमी तसेच पणजी फेरी धक्क्याजवळील जंक्शन वाहतूक सिग्नल एका वर्षापूर्वी उभारली होती. त्यामुळे या जंक्शनवर या वाहतूक सिग्नल यंत्रणेत अधूनमधून बिघाड होण्याचे प्रकार यापूर्वीही झाले असताना कोणीच त्याची दखल घेतली जात नसल्याने कार्यालये सकाळी सुरू होण्यापूर्वी व सुटल्यानंतर वाहनांची मोठ्या प्रमाणात वर्दळ होत असल्याने अपघाताचा धोका उद्‍भवण्याची शक्यता नाकारता येत नाही.

ही वाहतूक सिग्नल यंत्रणा ठप्प असल्याने जंक्शनवर प्रत्येक वाहन चालक पुढे जाण्यासाठी वाहने पुढे रेटत आहेत. दिवसभर या ठिकाणी वाहतूक पोलिस तैनात करण्यात येत नाही मात्र संध्याकाळी व सकाळच्यावेळी काही वेळेसाठी एकच वाहतूक पोलिस असल्याने वाहनांवर नियंत्रण ठेवताना त्याची तारांबळ उडत आहे.

पणजीतील दिवजा सर्कल येथेही वाहतूक सिग्नल यंत्रणा असली तरी गेल्या काही महिन्यांपासून बंद ठेवण्यात आले आहे. कार्यालये सुटल्यावर या जंक्शनवर पणजी बसस्थानकाच्या दिशेने जाणाऱ्या वाहनांच्या रांगा लागत आहेत. त्यातच या ठिकाणी बसथांबा आहे व या बसेस प्रवासी मिळवण्यासाठी बेशिस्तपणे उभ्या केल्या जात असल्याने वाहतुकीची कोंडी होत आहे.

शहरातील वाहतूक सिग्नल यंत्रणा पूर्णपणे ठप्प झाली असली तरी सांतिनेझ येथील जंक्शनवर वाहतूक सुरळीत सुरू आहे. सिग्नल असताना काहीवेळा विरुद्ध दिशेने वाहने उभी नसताना इतर रस्त्याच्या बाजूने वाहनांना विनाकारण ग्रीन सिग्नल सुरू होण्याची वाट पाहावी लागत असे. वाहतुकीची कोंडी न होता सुरळीत वाहतूक असल्याच्या प्रतिक्रिया वाहन चालकांनी व्यक्त केल्या.