डिचोलीत वाहतूक पोलिस विभाग सक्रिय

डिचोली: भीषण अपघातसत्रानंतर डिचोलीतही वाहतूक पोलिस विभाग गेल्या तीन-चार दिवसांपासून अधिक सक्रिय झाला आहे. मद्यपी आणि नियमांचे उल्लंघन करणाऱ्या वाहन चालका विरोधात वाहतूक पोलिसांतर्फे कडक मोहीम हाती घेण्यात आली आहे. वाहतूक पोलिस विभागाचे निरीक्षक गौरीश मळीक यांच्या मार्गदर्शनाखाली पीएसआय आणि एएसआय अधिकारी यांच्या नेतृत्वाखाली वाहतूक पोलिस विभागाच्या कार्यक्षेत्रात ही मोहीम चालू आहे.

(Traffic police department active in bicholim)

बुधवारी मद्यरात्रीपर्यंत दोन रात्री अस्नोडा पार पुलाजवळ पोलिसांनी केलेल्या कारवाईत दोन मद्यपी वाहनचालक आढळून आले. त्यांच्या विरोधात गुन्हे नोंद करण्यात आल्याची माहिती मिळाली आहे.

डिचोली-अस्नोडा मार्गावरील व्हाळशी येथील आयटीआय परिसर अपघात प्रवण क्षेत्र म्हणून घोषित करण्यात आले आहे. या क्षेत्रात वाहनांच्या वेगमर्यादेवर नियंत्रण आणण्यासाठी त्याठिकाणी कॅमेरा बसवून वाहनांची वेगमर्यादा तपासण्यात येत आहे. वेगमर्यादा आणि नियम मोडणाऱ्या वाहन चालकांना 'तालाव' देण्यात येत आहे.