गोवा सरकारकडून शिंजो आबेंना श्रध्दांजली, एक दिवसाचा दुखवटा जाहीर

Former Japanese Pm Shinzo Abe: जपानचे माजी पंतप्रधान शिंजो आबे यांची शुक्रवारी एका कार्यक्रमात गोळ्या झाडून हत्या करण्यात आली. स्थानिक प्रसारमाध्यमांनी पोलिस सूत्रांच्या हवाल्याने सांगितले की, आबे यांच्यावर हल्ला करणाऱ्या व्यक्तीने अनेक दिवसांपासून याची योजना आखली होती. त्याच्याकडून स्फोटकांचा मोठा साठाही जप्त करण्यात आला आहे. हल्लेखोराने शिंजो आबे यांच्यावर गोळ्या का झाडल्या हेही समोर आले आहे. तर दुसरीकडे, जगभरातून आबे यांच्या निधनामुळे शोक व्यक्त केला जात आहे. यातच भारत सरकारने शिंजो आबे यांच्या निधनामुळे राष्ट्रीय दुखवटा जाहीर केला आहे. तर राज्य पातळीवर गोवा सरकारने शनिवारी एक दिवसाचा दुखवटा‌ जाहीर केला आहे.

पंतप्रधान मोदींचे ट्विट

भारताचे पंतप्रधान नरेंद्र मोदी (Narendra Modi) आणि शिंजो आबे यांची मैत्री सर्वश्रुत आहे. आबे यांच्यावरील हल्ल्यानंतर पीएम मोदींनी ट्विट(Tweet) केले. ट्वीटमध्ये म्हटले की, “माझे प्रिय मित्र आबे शिंजो यांच्यावर झालेल्या हल्ल्यामुळे खूप दुःख झाले आहे. आमच्या संवेदना आणि प्रार्थना त्यांच्यासोबत आणि त्यांचे कुटुंबीय आणि जपानी लोकांसोबत आहेत."

दरम्यान, शिंजो आबे यांच्यावरील हल्ल्याबाबत ऑस्ट्रेलियाचे (Australia) पंतप्रधान अँथनी अल्बानीज (Anthony Albanese) म्हणाले की, "माजी पंतप्रधान शिंजो आबे यांना गोळ्या घालण्यात आल्या... ही अत्यंत धक्कादायक बातमी आहे. त्यांच्या कुटुंबियांबद्दल आणि जपानी लोकांप्रती आम्ही संवेदना व्यक्त करतो."

तसेच, शिंजो आबे यांच्यावर झालेल्या हल्ल्याबद्दल ब्रिटनचे पंतप्रधान बोरिस जॉन्सन (Boris Johnson) यांच्या वतीने शोक व्यक्त करण्यात आला आहे. "शिंजो आबे यांच्यावर झालेल्या भ्याड हल्ल्याने धक्का बसला. त्यांच्या हितचिंतक आणि कुटुंबीयांप्रती माझ्या संवेदना आहेत," असे जॉन्सन म्हणाले.