म्हापसा : पर्वरी ते पत्रादेवीपर्यंत राष्ट्रीय महामार्गाच्या (National Highways) बांधकामात केंद्र व राज्य सरकारकडून (State Government) तसेच कंत्राटदारांकडूनही कमालीची नियोजनशून्यता दिसून येते, अशी टीका काँग्रेसचे (Congress) उत्तर गोवा जिल्हा अध्यक्ष विजय भिके यांनी केली आहे. गोवाभर नेमकी हीच परिस्थिती असल्याचेही त्यांनी नमूद केले.
या प्रतिनिधीशी बोलताना श्री. भिके पुढे म्हणाले, करासवाडा ते बांबोळी महामार्गाच्या विस्तारीकरणाचे कंत्राट हे सुमारे 850 कोटी रुपये, तर पत्रादेवी ते करासवाडा प्रकल्पाचे काम सुमारे 630 कोटी रुपये मूल्याचे आहे.
कंत्राटदाराकडून हे बांधकाम अतिशय नीच दर्जाचे होत असून, काम करण्याच्या बाबतीत हलगर्जीपणाही दिसून येतो व त्याला केवळ संबंधित कंत्राटदारच नव्हे, तर सरकारही तेवढेच जबाबदार आहे. जनतेचा पैसा सत्कारणी न लावता अशा पद्धतीने उधळपट्टी केली जात आहे.
या महामार्गाच्या कामामुळे कित्येक झाडे तोडण्यात आली असून, पर्यावरणाला पूरक असलेल्या खारफुटीच्या झाडांवरही परिणाम झालेला आहे. त्याशिवाय कित्येक जलस्रोत व जलसाठेही नामशेष करून टाकण्यात आले आहेत, असा दावाही श्री. भिके यांनी केला.
निरपराध व्यक्तींचे बळी
विजय भिके म्हणाले, महामार्गाचे काम करणाऱ्या ‘एमव्हीआर इन्फ्रा’ कंपनीच्या बेजबाबदारपणामुळे व महामार्गावरील खड्ड्यांमुळे कित्येक निरपराध व्यक्तींचे बळी गेले आहेत. महामार्गावरून जाणारे प्रवासी व वाहनचालकांच्या सोयीसाठी आवश्यक असलेले वाहतूक आणि रस्ता सुरक्षेसंदर्भातील सूचनाफलक उभारण्यात शासकीय प्रशासन अपयशी ठरले आहे. यातून दिसणारा सरकारचा निष्काळजीपणा नेहमीचाच झालेला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
