वास्को : शहरात सध्या इंडियन ऑईल व अदानी ग्रुपतर्फे गॅसवाहिनीसाठी खोदकाम सुरू आहे. फा. डॉ. वाझ रस्त्यावर हे काम सुरू असताना बुधवारी रात्री 1 वाजता मुख्य वीजवाहिनी तुटली. त्यामुळे वास्को शहर, मांगोरहील, बायणा, मुरगाव, सडा परिसरातील वीज गायब झाली. तब्बल 21 तासांनंतर गुरुवारी रात्री 10 वाजता वीजपुरवठा सुरू झाला. (Vasco in goa without electricity for 21 hours)
या प्रकाराबद्दल नागरिकांनी वीज विभागासह इंडियन ऑईल कंपनी, अदानी ग्रुपच्या तुघलकी कारभारावर तीव्र नाराजी व्यक्त केली आहे. गॅस वाहिनीचे काम करणाऱ्या कंत्राटदाराने वीज खात्याचे लाखो रुपयांचे नुकसान केल्याबद्दल इंडियन ऑईल कंपनी, अदानी ग्रुपवर वीज विभागाने पोलिसांत तक्रार नोंदवावी, अशी मागणी लोकांनी केली आहे.
बुधवारी रात्री 1 वाजता वीजवाहिनी तुटल्यामुळे अर्ध्या वास्को शहरासह मांगोरहील, बायणा, मुरगाव, सडा भागातील लोक हैराण झाले. अचानक वीज गेल्याने लोकांनी त्वरित वीज विभागाशी संपर्क साधला. मात्र, वीज कुठून गेली, याचा शोध घेताना वीज कर्मचाऱ्यांना बराच त्रास सहन करावा लागला. अखेर बोर्जीस इमारतीसमोरील फा. डॉ. वाझ रस्त्यावर गॅसवाहिनीसाठी खोदकाम करताना वीजवाहिनी तुटल्याचे लक्षात येताच रात्रभर वीज विभागाचे कर्मचारी काम करत होते. पण गुरुवारी रात्री 9 वाजेपर्यंत वीज विभागाला पुरवठा सुरळीत करण्यात यश आले नव्हते.
गुरुवारी रात्री उशिरापर्यंत काम सुरू
गुरुवारी संपूर्ण दिवस वीज खात्याचे कर्मचारी तसेच गॅस वाहिनीचे काम करणाऱ्या कंत्राटदाराचे कामगार वीजपुरवठा सुरळीत करण्यासाठी झटत होते. वास्को वीज विभागाचे साहाय्यक अभियंता संजय म्हाळसेकर यांनी आपल्या सहकाऱ्यांसोबत बुधवारी रात्रीपासून वीज केबल दुरुस्त करण्यासाठी शर्तीचे प्रयत्न केले.
मुदत संपली, तरीही काम सुरूच
दक्षिण गोवा सार्वजनिक बांधकाम रस्ते विभागाने गॅसवाहिनीसाठी रस्त्याचे खोदकाम करण्यास १५ मेपर्यंत परवानगी दिली होती. मात्र, रस्ता खोदण्याचे काम अजूनही सुरू असल्याने नगरसेवक फ्रेड्रीक हेन्रीक यांनी नाराजी व्यक्त केली. इंडियन ऑईल कंपनी तसेच अदानी ग्रुपला मुरगाव पालिकेने रस्ता खोदकामासाठी परवानगी नाकारली होती, अशी माहिती हेन्रीक यांनी दिली.
वास्कोत मार्चपासून गॅस वाहिनीसाठी खोदकाम सुरू आहे. गेल्या आठवड्यात गॅस वाहिनीसाठी खोदकाम करताना सार्वजनिक बांधकाम खात्याची जलवाहिनी एफ. एल. गोम्स मार्गावर तोडली होती. त्यामुळे लाखो लीटर पाण्याची नासाडी झाली होती. त्यावेळीही लोकांची गैरसोय झाली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
