आधी सडलेले, आता रास्त भाव दुकानांतर्फे दिले जातायत चक्क प्लॅस्टिकचे तांदूळ! आमदार वेंझी व्हिएगस यांनी केली चौकशीची मागणी

गोव्यात सध्या सडलेले धन्य वाटप करण्यावरून मोठ्या प्रमाणात राजकारण सुरू आहे. यातच आता अजून एक धक्कादायक माहिती समोर आली आहे. बाणावली आपचे आमदार वेंझी व्हिएगस यांनी रास्त भाव दुकानांतर्फे भेसळयुक्त तांदूळ पुरवठा केला जात असल्याचा खुलासा केला आहे.

गोन्साल्विस नावाच्या महिलेने वेंझी यांची त्यांच्या आमदार कार्यालयात भेट घेऊन बाणावलीतील रास्त भाव दुकानातून खरेदी केलेला तांदूळ भेसळयुक्त असल्याची माहिती दिली.

तांदूळ खरेदी करून घरी नेल्यावर तो नीट शिजत नसून पाण्यात तरंगत असल्याचे तिच्या निदर्शनास आले. त्यांनी याची माहिती वेंझीना दिली. त्यावेळी वेंझी यांच्या संपूर्ण प्रकार लक्षात आला आणि बाणावलीतील रास्त भाव दुकानात काही प्रमाणात प्लास्टिक तांदूळ घालणाऱ्या अधिकाऱ्यांवर त्यांनी भ्रष्टाचाराचा आरोप केला.

माध्यमांसाठी त्यांनी सामान्य तांदूळ आणि भेसळयुक्त तांदूळ पाण्यात कसे दिसतात याचे प्रात्यक्षिक करून दाखवले. त्यानंतर प्लॅस्टिक असल्याचा आरोप असलेल्या तांदळाचे दाणे जाळले आणि त्याचा चुरा केला. यावरून ते तांदळाचे दाणे नसून प्लॅस्टिक असल्याचे सिद्ध झाले.

त्यांनी दिलेल्या माहितीनुसार, त्यांनी आधीच मुख्यमंत्री, नागरी पुरवठा मंत्री रवी नाईक आणि दक्षता विभागाला ईमेल करून या प्रकरणाची चौकशी करण्यास सांगितले आहे आणि मंगळवारी अधिकृत तक्रार करणार करणार असल्याचे सांगितले.

ते पुढे असेही म्हणाले की ते एफडीए प्रयोगशाळेत तपासणीसाठी आणि दोन इतर नमुने दोन खाजगी प्रयोगशाळेत त्यांच्या अहवालासाठी पाठवणार आहेत.