विषाणू ‘म्युटेड’ होऊ शकतो, लस घेणं हाच पर्याय
Vishwajit RaneDainik Gomantak

विषाणू ‘म्युटेड’ होऊ शकतो, लस घेणं हाच पर्याय

आरोग्यमंत्री विश्‍वजीत राणेंचं आवाहन; 60 वर्षांवरील नागरिकांचे बुस्टर डोस घेण्याचे प्रमाण कमी

पणजी : सध्या राज्यात सक्रिय रुग्णांची संख्या 376 झाली आहे. केरळ, दिल्ली, महाराष्ट्रापाठोपाठ गोव्याचा नंबर लागत असल्याने नागरिकांनी सतर्क होणे अत्यंत गरजेचे आहे. अशा स्थितीत विषाणू म्युटेड म्हणजे बदलूदेखील शकतो. कदाचित तो सध्याच्या स्थितीपेक्षा त्रासदायकही असू शकतो. त्यामुळे बुस्टर डोससाठी पात्र नागरिकांनी आणि 12 वर्षांवरील मुलांनी लस घ्यावी असे आवाहन आरोग्यमंत्री विश्‍वजीत राणे यांनी केले.

राज्यात वाढत असलेल्या कोरोनाबाधितांचे प्रमाण लक्षात घेऊन आरोग्य प्रशासनाने कोरोनासंबंधीची तज्ज्ञ समितीची बैठक काल बुधवारी घेतली. यावेळी गोवा वैद्यकीय महाविद्यालय आणि रुग्‍णालयाचे डीन डॉ. शिवानंद बांदेकर, आरोग्य संचालक डॉ. गिता काकोडकर, लसीकरण प्रमुख डॉ. राजेंद्र बोरकर, साथरोग विभाग प्रमुख डॉ. उत्कर्ष बेतोडकर यांच्यासह वैद्यकीय क्षेत्रातील अनेक तज्ज्ञ डॉक्टर उपस्थित होते. सर्वांनुमते लसीकरणावर भर देण्यासाठी विशेष प्रयत्न करणे गरजेचे असल्याचे मत व्यक्त करण्यात आले.

कोरोना सक्रिय रुग्णांची संख्या 376, 77 नवे बाधित 26 बरे

राज्यात बुधवारी कोरोनाचे नवे तब्बल 77 रुग्ण सापडले असून संक्रमणाचा दर 8.02 टक्के इतका झाला आहे. तर सक्रिय रुग्णांची संख्या 376 झाली आहे. राज्यात आतापर्यंत 2 लाख 46 हजार 192 नागरिकांना कोरोनाची बाधा झाली असून यापैकी 2 लाख 41 हजार 984 रुग्ण बरे झाले. हे रुग्ण बरे होण्याचे प्रमाण 98.29 टक्के इतके आहे. काल दिवसभर 960 संशयित रुग्णांच्या चाचण्या घेण्यात आल्या.

Vishwajit Rane
गोव्यातील आजचे पेट्रोल-डिझेलचे दर जाणून घ्या

बुस्टर डोसकडे लोकांचे दुर्लक्ष

60 वर्षांवरील सर्व नागरिक, विविध रोगांनी ग्रस्त रूग्ण, फ्रंटलाईन वर्कर, आरोग्य कर्मचाऱ्यांची राज्यात 1 लाख 24 हजार 362 संख्या आहे. पण केवळ 58 हजार 862 जणांनी बूस्टर डोस घेतला. अजुनही 65 हजार 500 जण डोसविना आहेत. हे गंभीर असून विषाणूत बदल झाल्यास संभाव्य धोका वाढू शकतो. वाईट घटना घडल्यानंतरच लोक शहाणे होतात, हे बदलले पाहिजे. तेव्हा पात्र नागरिकांनी त्वरित डोस घेण्याचे आवाहन राणे यांनी केले.

बाल रुग्णालयात डोसची सोय

प्रशासनाचे लक्ष आता लहान मुले असून 12 ते 18 वयोगटातील सर्व मुलांना लस देण्याचा उद्देश आहे. यासाठीच राज्य सरकारने राज्यातील बाल रुग्णालयातही कोरोना डोसची सोय केली आहे. रुग्णांच्या संमतीने हा डोस दिला जाणार आहे. राज्य सरकारच्या या निर्णयाचा बालरोग तज्ज्ञ असोसिएशनने स्वागत केल्याचे डॉ. धनेश वळवईकर यांनी सांगितले.

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
www.dainikgomantak.com