'कदंब पठाराला युनिफॉर्म एफएसआय द्यावा'

पणजी : पणजी शहराला नैसर्गिक वाढीवर मर्यादा आहेत. शहर वाढीसाठी कदंब पठार हा अत्यंत उपयुक्त भाग आहे, जिथे पणजीची पुढील वाढ होऊ शकते. माझे वडील मुख्यमंत्री असताना या पठारावरून रस्ता तयार केला. पुढे मनोहर पर्रीकर मुख्यमंत्री झाल्यावर या रस्त्याचे दुपदरीकरण करण्यात आले. त्यामुळे या भागात युनिफॉर्म एफएसआय देणे आवश्यक आहे असे वक्तव्य मंत्री विश्वजीत राणे यांनी केलं आहे. गोमन्तकला दिलेल्या खास मुलाखतीत त्यांनी विविध विषयांवर सडेतोड भाष्य केलं.

पणजी शहरात महापालिकेपेक्षा नगर नियोजन आणि विकास प्राधिकरणाला अधिक अधिकार आहेत. यासाठी महापालिकेसह सर्व पालिकानी स्वतःचे मास्टर प्लान तयार करणे गरजेचे आहे. त्याशिवाय त्यांचा विकास सुनियोजित होणार नाही. यासाठी अनुभवी आणि जाणकार तज्ज्ञांचा मदत घेणे गरजेचे आहे. तसे निर्देश मी महापालिका आणि पालिका प्रशासनाला दिले आहेत. असेही राणे म्हणाले.

दरम्यान गोव्यातील काँग्रेस नेतृत्वावर नगरनियोजन मंत्री विश्वजीत राणे यांनी थेट निशाणा साधला आहे. गोव्यात कॉंग्रेस पक्षाकडे नेतृत्वाचा अभाव आहे. आज आहेत ते उद्या कुठे जाणार, हे माहीत नाही. जे नेते झाले आहेत त्यांना तीन महिने देखील अजून झालेले नाहीत. त्यांच्या पक्षाच्या अध्यक्षाची मनःस्थिती चांगली नाही, अशा शब्दात विश्वजीत राणेंनी काँग्रेसवर हल्लाबोल केला आहे. विरोधी पक्षनेते देखील नवे आहेत त्यांच्यापाशी कोणतीही विचारधारा नाही, असा टोलाही त्यांनी लगावला आहे.