जलवाहिनी पुन्हा फुटली! जेसीबीचा वाहिनीला धक्का

म्हापसा : गिरी-म्हापसा येथील सर्व्हिस रस्त्यावरील भूमिगत जलवाहिनी रविवारी (ता. 24) रस्ता विभागाच्या आततायीपणामुळे पुन्हा एकदा फुटली. शनिवारी सकाळी हीच जलवाहिनी अचानकपणे फुटली होती.

त्यानंतर, सदर जलवाहिनी दुरुस्त करण्यात आलेली व मातीचा भराव टाकून रस्त्यावर पडलेला खड्डा बुजवून सपाटीकरण करताना या जलवाहिनीला धक्का बसल्याने ती फुटली असावी,असा संशय आहे.

(Waterline Burst in Mapusa)

प्राप्त माहितीनुसार, शनिवारी गिरी-म्हापसा येथील भूमिगत जलवाहिनी पाण्याच्या दबावामुळे फुटली होती व त्यामुळे सदर रस्ता खचल्याने त्याठिकाणी मोठे भगदाड पडले होते. कालांतराने सार्वजनिक बांधकाम खात्याच्या पाणीपुरवठा विभागाने ही वाहिनी दुरुस्ती करण्याचे काम हाती घेतले. हे काम शनिवारी मध्यरात्री दीड वाजण्याच्या सुमारास पूर्ण झाले.

त्यानंतर, रविवारी (ता.24) दुपारी रस्ता विभागाकडून याठिकाणी मातीचा भराव टाकून हे भगदाड बुजविले जात होते. त्यावेळी रोलर फिरवताना या पाईपलाइनला धक्का पोहचल्याने कदाचित ही जुनी 500 एमएलडी वाहिनी पुन्हा फुटल्याचा संशय साबांखा पाणीपुरवठ्याच्या अधिकाऱ्यांनी व्यक्त केला.