गोव्यात लवकरच सुरु होणार व्हाईट वाॅटर राफ्टिंग; गोवा पर्यटन विकास महामंडळाचा पुढाकार

White Water Rafting Goa : गोवा पर्यटन विकास महामंडळ व ब्रिटिश ॲडव्हेंचर स्पोर्ट्स यांच्या संयुक्त विद्यमाने सुरू करण्यात आलेल्या गोवा सरकारच्या व्हाईट वॉटर राफ्टिंगच्या यंदाचा मोसम पुढील आठवड्यापासून सुरु होण्याची शक्यता आहे.

सत्तरी तालुक्यातील धावे गावातून सदर व्हाईट राफ्टिंगची पहिली फेरी सुरू होणार आहे. मात्र, अजुन नदीच्या पाण्याची पातळी वाढलेली नाही. त्यामुळे विलंब झाला आहे. मात्र, जर पावसाचा जोर असा कायम राहीला तर पुढच्या आठवड्यापासून हे साहसी व्हाईट वाॅटर राफ्टिंग सुरु करण्यात येणार असल्याची माहिती प्राप्त झालेली आहे.

याबाबतची माहिती अशी की, नगरगाव पंचायत क्षेत्रातील धावे सत्तरी या ठिकाणी म्हादई नदीच्या प्रवाहावर काही वर्षांपूर्वी गोवा राज्याचे माजी मुख्यमंत्री मनोहर पर्रीकर यांनी गोवा पर्यटन विकास महामंडळाच्या माध्यमातून पर्यटकांना संधी उपलब्ध करून देण्यासाठी व्हाईट वॉटर राफ्टिंग या प्रकल्पाला सुरुवात केली होती.

याला सातत्याने मिळणारा वाढता प्रतिसाद यापार्श्वभूमीवर यंदाही सदर प्रकल्पाच्या पावसाळी मोसमास पुढील आठवड्यापासून प्रारंभ करण्यात येणार आहे. धावे सत्तरी येथून या प्रवासाला सुरुवात करण्यात आल्यानंतर 10 किलोमीटरचे अंतर दीड तासामध्ये पूर्ण करून सावर्डेत समाप्ती करण्यात येत असते. यामुळे पर्यटकांना म्हादई नदीच्या दऱ्याखोऱ्यात असलेल्या नैसर्गिक सौंदर्याचा लाभ घेण्याची चांगली संधी निर्माण होत असते.