Yuri Alemao : कुंकळ्ळीच्या विकासाची उद्दिष्टे निश्चित

Yuri Alemao : कुंकळ्ळी मतदारसंघात गेल्या दहा वर्षांत कोणताही विकास झालेला नाही. मागील दहा वर्षांत संपूर्णपणे दुर्लक्षित झालेल्या अनेक समस्या प्राधान्यक्रमाने सोडविणे आवश्यक आहे. कुंकळ्ळीच्या विकासासाठी आम्ही आता अल्प, मध्यम आणि दीर्घकालीन उद्दिष्टे निश्चित केली आहेत, असे कुंकळ्ळीचे आमदार युरी आलेमाव यांनी सांगितले.

कुंकळ्ळी मतदारसंघातील नवनिर्वाचित पंचायत सदस्यांसह सार्वजनिक बांधकाम, जलसंसाधन, वीज आणि कृषी विभागाच्या अधिकाऱ्यांच्या बैठकीनंतर ते बोलत होते. आम्ही योग्य पाठपुरावा करून सर्व कामे वेळेत पूर्ण करू. सर्व पंचायत सदस्यांनी कुंकळ्ळीच्या प्रगतीवर लक्ष केंद्रित करून एकसंध राहून काम करावे, असे युरी आलेमाव म्हणाले.

माकाझान, गिरदोली, चांदर, आंबावली, पारोडा व बाळ्ळी येथील बहुतेक सरपंच, उपसरपंच व पंचायत सदस्यांनी या बैठकीला उपस्थित राहून आपापल्या पंचायत क्षेत्रातील लोकांच्या विविध समस्या मांडल्या. आम्ही प्राधान्यक्रम ठरवू आणि कामे हाती घेऊ, असे युरी आलेमाव यांनी सांगितले.

सार्वजनिक बांधकाम, जलसंपदा विभाग, वीज आणि कृषी खात्याच्या सरकारी अधिकाऱ्यांनी या बैठकीला उपस्थित असलेल्या आमच्या पंचायत सदस्यांनी उपस्थित केलेल्या विविध मुद्यांची व समस्यांची दखल घेतली आहे, असे युरी आलेमाव यांनी सांगितले.

सहकार्याचे आवाहन

माझ्या मतदारसंघातील कामांच्या प्रगतीचा आढावा घेणार आहे. विकासकामे राबविताना सरकारी अधिकाऱ्यांना सहकार्य करावे, असे मी नागरिकांना नम्रपणे आवाहन करतो, असे युरी आलेमाव म्हणाले.