AFC Champions League: एफसी गोवास आगामी मोसमात लाभ होण्याची आशा

दैनिक गोमंतक
शनिवार, 15 मे 2021

गोव्यातील फातोर्डा येथील पंडित जवाहरलाल नेहरू स्टेडियमवर एएफसी चँपियन्स लीग स्पर्धेच्या ई गटातील सामने झाले.

पणजी : आशियाई फुटबॉल महासंघाच्या (एएफसी) चँपियन्स लीग फुटबॉल स्पर्धेत (AFC Champions League) खेळून नवा आत्मविश्वास गवसला असून त्याचा लाभ एफसी गोवा संघाला इंडियन सुपर लीग (आयएसएल) फुटबॉल स्पर्धेच्या आठव्या मोसमात खेळताना निश्चितच होईल, असे मत संघाचा अनुभवी मध्यरक्षक ब्रँडन फर्नांडिस (Brandon Fernandes) याने व्यक्त केले आहे.

गोव्यातील फातोर्डा येथील पंडित जवाहरलाल नेहरू स्टेडियमवर एएफसी चँपियन्स लीग स्पर्धे दरम्यान ई गटातील सामने झाले. 14 ते 29 एप्रिल या कालावधीत झालेल्या या स्पर्धेत एफसी गोवाने तीन गुणांसह इराणच्या पर्सेपोलिस व संयुक्त अरब अमिरातीचा अल वाहदा क्लबनंतर तिसरा क्रमांक मिळविला. एएफसी चँपियन्स लीग स्पर्धेत खेळण्याची एफसी गोवाची ही पहिलीच वेळ होती. (AFC Champions League FC Goa hopes to benefit in the upcoming season)

वैयक्तिक पातळीवर 26 वर्षीय गोमंतकीय मध्यरक्षक ब्रँडनसाठी ही स्पर्धा स्वप्नवत ठरली. स्पर्धेतील सहा सामन्यांत मिळून एफसी गोवाने दोन गोल नोंदविले आणि दोन्ही वेळेस ब्रँडनचे असिस्ट यशस्वी ठरले. स्पर्धेत खेळल्याने आमचा आत्मविश्वास उंचावला आहे, त्यात दुमत नाही, असे ब्रँडनने `इंडियनसुपरलीग डॉट कॉम`ला सांगितले.

AFC Champions League: एफसी गोवाच्या नवोदितांची छाप; प्रशिक्षक आनंदित

``चुका करण्याचा स्तर खूप कमी असेल आणि सर्वोत्तम क्षमता प्रदर्शित करायची आहे हे आम्हाला माहीत होते, त्यासाठी सूर गवसणे आवश्यक होते. जे आम्ही करू शकलो,`` असे ब्रँडन म्हणाला. ``आमच्या क्षमतेवरील विश्वास, तसेच आत्मविश्वासही कमालीचा उंचावला आहे, त्याचा लाभ आगामी मोसमात होईल,`` असे 10 क्रमांकाच्या जर्सीत खेळणाऱ्या मध्यरक्षकाने नमूद केले.

एफसी गोवाचा अनुभवी मध्यरक्षक

ब्रँडन 2017 पासून एफसी गोवातर्फे खेळत असून त्याने या क्लबचे आयएसएल स्पर्धेत 62 सामन्यांत प्रतिनिधित्व केले असून 5 गोल आणि 18 अशी कामगिरी केली आहे. यावर्षी एफसी गोवाने त्याचा करार जून 2024 पर्यंत वाढविला आहे. ब्रँडन 2020-21 मोसमात एफसी गोवातर्फे 12 सामने खेळला, दुखापतीमुळे त्याला काही सामन्यांना मुकावे लागले, मात्र एएफसी चँपियन्स लीगसाठी तो पूर्ण क्षमतेने सज्ज झाला.

 

संबंधित बातम्या