CK Nayudu Trophy : सलामीच्या के. महीप कुमार याचे शानदार शतक, त्याने शेख राशिद याच्यासमवेत दुसऱ्या विकेटसाठी केलेली 149 धावांची दमदार भागीदारी, तसेच तळाच्या फलंदाजांनी लढवलेला किल्ला यामुळे कर्नल सी. के. नायडू करंडक 25 वर्षांखालील क्रिकेट सामन्यात आंध्रने खूपच मजबूत स्थिती गाठली.
त्यांनी गोव्यावर पहिल्या डावात 272 धावांची भक्कम आघाडी घेतली. पर्वरी येथे सुरू असलेल्या सामन्याच्या दुसऱ्या दिवशी आंध्रने कालच्या 1 बाद 123 वरून सर्वबाद 378 धावा केल्या.
दिवसभरातील बाकी पाच षटकांत गोव्याने बिनबाद आठ धावा केल्या. पहिल्या डावात 106 धावांत गारद झालेला यजमान संघ आता 264 धावांनी मागे आहे. पराभव टाळण्यासाठी गोव्याला भरपूर मेहनत घ्यावी लागेल हे स्पष्ट आहे.
मोसमातील चौथे शतक
कर्नल सी. के. नायडू करंडक स्पर्धेच्या यंदाच्या मोसमात माहीप कुमार याने वैयक्तिक चौथे शतक ठोकले. यामध्ये दोन द्विशतकांचाही समावेश आहे. त्याने 120 धावांची खेळी केली. 257 चेंडूंचा सामना करताना 15 चौकार मारले.
महीपला शेख राशिद याची चांगली साथ लाभली. गतवर्षी 19 वर्षांखालील विश्वकरंडक विजेत्या भारतीय संघातून खेळताना महत्त्वपूर्ण योगदान दिलेल्या राशिदचे शतक 12 धावांनी हुकले. लेगस्पिनर मनीष काकाडे याने त्याला वैयक्तिक 88 धावांवर योगेश कवठणकरच्या हाती झेल देण्यास भाग पाडले.
18 वर्षीय फलंदाजाने १४७ चेंडूंतील खेळीत 18 चौकार लगावले. महीपला फिरकी गोलंदाज योगेश कवठणकर याने त्रिफळाचीत बाद केले. त्यापूर्वी त्याने यारा संदीप (21) याच्या साथीत तिसऱ्या विकेटसाठी 61 धावांची भर टाकली.
अखेरच्या तीन विकेटतर्फे 82 धावा
गोव्याच्या फिरकी गोलंदाजांनी आंध्रची स्थिती 7 बाद 296 अशी केली असता, त्यांच्या शेवटच्या तीन विकेटतर्फे धावसंख्येत 82 धावांची भर टाकली. त्यामुळे पाहुण्या संघाची आघाडी वाढली.
कर्णधार गिरिनाथ रेड्डी (32) याने पृदवी (नाबाद 23) याच्या साथीत आठव्या विकेटसाठी 55 धावांची भागीदारी केली. गोव्याचा कर्णधार दीपराज गावकरने गिरिनाथला त्रिफळाचीत बाद करून ही जोडी फोडली.
संक्षिप्त धावफलक
गोवा, पहिला डाव : सर्वबाद 106 व दुसरा डाव : 5 षटकांत बिनबाद 8 (राहुल मेहता नाबाद 7, मंथन खुटकर नाबाद 1).
आंध्र, पहिला डाव (1 बाद 123 वरून) : 121.3 षटकांत सर्वबाद 378 (के. माहीप कुमार 120, शेख राशिद 88, यारा संदीप 21, एस. तरुण 25, ध्रुवकुमार रेड्डी 14, गिरिनाथ रेड्डी 32, पृदवी नाबाद 23, एम. अंजनेयेलू 12, शुभम तारी 16-3-69-0, समीत आर्यन मिश्रा 22-7-49-1, दीपराज गावकर 15-3-30-1, कीथ पिंटो 23.3-3-65-3, मनीष काकोडे 18-3-73-3, योगेश कवठणकर 11-1-31-1, दीप कसवणकर 16-2-37-1).
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
