एटीके मोहन बागानची लढत बंगळूरशी, दोन्ही संघ पाच सामने अपराजित

पणजी : इंडियन सुपर लीग (आयएसएल) फुटबॉल (ISL football) स्पर्धेच्या आठव्या मोसमात एटीके मोहन बागान आणि बंगळूर एफसी सलग पाच सामने अपराजित आहेत, पण त्यापैकी तीन सामने बरोबरीत सुटले. उभय संघांतील लढत शनिवारी (ता. 15) फातोर्डा येथील पंडित जवाहरलाल नेहरू स्टेडियमवर होईल, त्यावेळी कोंडी फोडण्यासाठी दोन्ही संघ इच्छुक असतील.

एटीके मोहन बागान आणि बंगळूर यांच्यातील पहिल्या टप्प्यातील सामना गेल्या 16 डिसेंबर रोजी झाला होता, तेव्हा बांबोळी येथील लढत 3-3 अशी गोलबरोबरीत राहिली होती. खेळाडू कोविड (covid-19) बाधित आढळल्यामुळे एटीके मोहन बागानचा मागील शनिवारचा ओडिशा एफसीविरुद्ध सामना लांबणीवर टाकण्यात आला.

नवे प्रशिक्षक हुआन फेरांडो यांच्या मार्गदर्शनाखालील तीन लढतीत कोलकात्याच्या संघाने दोन विजय नोंदविले असून एक सामना बरोबरीत राखला आहे. निलंबनामुळे प्रमुख मध्यरक्षक ह्युगो बुमूस याच्या अनुपस्थितीत एटीके मोहन बागानला खेळावे लागेल.

गतविजेत्या मुंबई (Mumbai) सिटीला पराभूत केल्यामुळे बंगळूरचा आत्मविश्वास उंचावलेला असेल, त्यामुळे शनिवारची लढत चुरसपूर्ण होण्याचे संकेत आहेत. बंगळूरचा बचावपटू रोशन नाओरेम याने स्पर्धेत उल्लेखनीय खेळ केला आहे. संघासाठी महत्त्वपूर्ण दुवा ठरताना त्याने पाच असिस्टची नोंद केली आहे. मुंबई सिटीविरुद्ध दोन गोल त्याच्याच असिस्टवर झाले.

फॉर्ममध्ये असलेला कोंगो देशाचा आघाडीपटू प्रिन्स इबारा याचा एटीके मोहन बागानला धोका असेल. त्याने मुंबई सिटीविरुद्ध दोन गोल करताना स्पर्धेत एकूण चार वेळा चेंडूची नेटची दिशा दाखविली आहे.

‘टॉप फोर’चे लक्ष्य

एटीके मोहन बागानने सध्या नऊ सामन्यांतून 15 गुण आहेत. शनिवारी विजय नोंदविल्यास गुणतक्त्यातील पहिल्या चार संघांत (टॉप फोर) जागा मिळविण्याची गतउपविजेत्यांची आशा पल्लवित होईल. माजी विजेता बंगळूर (Bangalore) एफसीही प्रगतीसाठी प्रयत्नशील आहे. 11 सामने खेळल्यानंतर त्यांच्या खाती 13 गुण आहेत. एटीके मोहन बागानने 20 गोल, तर बंगळूरने 19 गोल नोंदवले आहेत.