Sania Mirza and Rohan Bopanna: शुक्रवारी ऑस्ट्रेलियन ओपन 2023 स्पर्धेतील मिश्र दुहेरीचा अंतिम सामना पार पडला. या सामन्यात सानिया मिर्झा आणि रोहन बोपन्ना या भारतीय जोडीला ब्राझीलच्या ल्युसा स्टेफानी आणि राफेल मातोस या जोडीने पराभूत करत विजेतेपद जिंकले. त्यामुळे सानिया आणि रोहन यांना उपविजेतेपदावर समाधान मानावे लागले.
रोड लॅवर एरिना येथे झालेल्या अंतिम सामन्यात सानिया - बोपन्ना यांना 6-7 (2-6), 2-6 अशा फरकाने पराभवाचा सामना करावा लागला. हा सानियाचा ग्रँडस्लॅम स्पर्धेतील शेवटचा सामनाही ठरला. मात्र अखेरच्या ग्रँडस्लॅममध्ये विजेतेपद मिळवण्याचे तिचे स्वप्न अधूरे राहिले. त्यामुळे तिची ग्रँडस्लॅम कारकिर्द 6 विजेतेपदांसह संपली.
अंतिम सामन्यात पहिल्या सेटमध्येच सानिया - बोपन्ना यांनी 0-2 अशा पिछाडीनंतरही 3-2 अशी आघाजी घेतली होती. पण त्यानंतर ब्राझिलियन जोडीने 3-3 अशी बरोबरी साधली. पण यानंतरही सानिया-बोपन्नाने पुन्हा 5-3 अशी आघाडी घेतली.
मात्र, स्टेफानी - मातोस यांची जोडी हार मानण्यास तयार नव्हती. त्यांनी झुंज देत त्यांनी या सेटमध्ये बरोबरी साधली. त्यामुळे पहिला सेट टायब्रेकरमध्ये गेला. टायब्रेकरमध्ये स्टेफानी आणि मातोस यांनी बाजी मारली आणि पहिला सेट 7-6 (6-2) असा जिंकला.
दुसऱ्या सेटमध्ये स्टेफानी आणि मातोस यांनी एकतर्फी वर्चस्व राखले होते. त्यांनी 4-1 अशी आघाडी सहज घेतली होती. त्यांनतरही सानिया आणि बोपन्ना यांनी संघर्ष करत पुनरागमनाचा प्रयत्न केला. मात्र, स्टेफानी आणि मातोस यांनी त्यांना विजयापर्यंत पोहचू दिले नाही आणि सेट 6-2असा सहज जिंकत विजेतेपदावरही नाव कोरले.
दरम्यान, सानियाने यापूर्वीच स्पष्ट केले होते की ऑस्ट्रेलियन ओपन 2023 स्पर्धा तिची अखेरची ग्रँडस्लॅम असणार आहे. यानंतर ती तिच्या कारकिर्दीतील अखेरची स्पर्धा दुबईमध्ये फेब्रुवारी महिन्यात खेळेल.
सानियाने जिंकलेल्या 6 ग्रँडस्लॅम विजेतेपदांमध्ये तीन मिश्र दुहेरीतील आणि तीन महिला दुहेरीतील विजेकेपदांचा समावेश आहे. तिने मिश्र दुहेरीत 2009 मध्येऑस्ट्रेलियन ओपन, 2012 साली फ्रेंच ओपन आणि 2014 साली अमेरिकन ओपन विजेतेपद जिंकले होते.
त्याचबरोबर तिने महिला दुहेरीत 2015 साली विम्बल्डन आणि अमेरिकन ओपन, तसेच 2016 साली ऑस्ट्रेलियन ओपन विजेतेपद जिंकले होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
