बांगलादेशी दिग्गजाचा नवा विक्रम, असे करणारा जगातील ठरला पहिला क्रिकेटपटू

बांगलादेशचा दिग्गज क्रिकेटर अनामूल हकने एक खास विक्रम आपल्या नावावर केला आहे. लिस्ट ए टूर्नामेंटमध्ये 1000 हून अधिक धावा करणारा अनामूल हा जगातील पहिला क्रिकेटपटू ठरला आहे. ढाका प्रीमियर डिव्हिजन क्रिकेट लीगमध्ये अनामूल हकने (Anamul Haque) हा विक्रम केला आहे. या स्पर्धेत अनामूलने 3 शतके झळकावली आहेत. यासह अनामूलने लिस्ट ए क्रिकेटमध्ये (Cricket) 15 शतके झळकावली आहेत. अनामूलने लिस्ट ए टूर्नामेंटमध्ये 1000 हून अधिक धावा करुन एक खास विक्रम तर केलाच त्याचबरोबर टॉम मुडीचा विक्रमही मोडला. मुडीने 1991 साली खेळल्या गेलेल्या संडे लीग स्पर्धेत एकूण 917 धावा केल्या होत्या. (Bangladesh cricketer Anamul Haque has scored over 1000 runs in the List A tournament)

लिस्ट ए लीग स्पर्धेत सर्वाधिक धावा करणारे खेळाडू

1. 1042 - ढाका प्रीमियर लीग, 2022 मध्ये अनामूल हक

2. 917 - टॉम मूडी, संडे लीगमध्ये, 1991

3. 902 - जिमी कुक, संडे लीगमध्ये, 1990

4. 861 - जॅक रुडॉल्फ, प्रो 40, 2010

दरम्यान, अनामूल हकच्या आंतरराष्ट्रीय क्रिकेटबद्दल बोलायचं झाल्यास, या क्रिकेटपटूने आतापर्यंत 4 कसोटी सामने खेळले आहेत आणि 38 एकदिवसीय सामने खेळण्यात तो यशस्वी ठरला आहे. त्याचबरोबर हकने बांगलादेशकडून (Bangladesh) 13 टी-20 आंतरराष्ट्रीय सामने खेळण्यातही यश मिळवले आहे. अनामूल हकने वनडेत आतापर्यंत 3 शतके झळकावली आहेत.

तसेच, आनामूल हक बिजॉय हा स्पर्धेच्या मागील सामन्यात लिस्ट ए क्रिकेटमध्ये सर्वाधिक धावा करणारा खेळाडू बनला होता. 24 एप्रिल रोजी झालेल्या सामन्यात शेख जमाल धनमंडी क्लब विरुद्ध त्याने 52 धावांची खेळी केली आणि ही खास कामगिरी करण्यात तो यशस्वी ठरला. त्याच्या या विक्रमाने टॉम मूडीजचा विक्रम मोडला गेला. मुडीने 1991 साली इंग्लंडच्या (England) संडे लीगमध्ये वूस्टरशायरसाठी 15 डावात 917 धावा केल्या होत्या.