BCCI, PCB चा वाद! आशिया चषकात तुम्ही नाही आले तर, विश्वचषकासाठी आम्ही नाही येणार

पाकिस्तानमध्ये 2023 मध्ये पुढचा आशिया चषक (Asia Cup) होणार आहे. यावरून बीसीसीआयचे (BCCI) सचिव जय शाह यांनी आशिया चषकाच्या ठिकाणावरून वक्तव्य केले. पाकिस्तान क्रिकेट बोर्डाने (PCB) याबाबत आक्रमक भूमिका घेत, भारतीय संघ आशिया चषक खेळण्यासाठी आला नाही तर पीसीबी 2023 मध्ये भारतात होणाऱ्या एकदिवसीय विश्वचषकासाठी आपला संघ पाठवणार नाही, असे पीसीबीने म्हटले आहे. या सर्व प्रकरणावर आता केंद्रीय क्रीडा मंत्री अनुराग ठाकूर (Anurag Thakur) यांनी प्रतिक्रिया दिली आहे.

'बीसीसीआयकडे हा विषय आहे आणि ते यावर भाष्य करतील. भारत क्रीडा क्षेत्रातील महासत्ता आहे, भारतात अनेक विश्वचषकांचे आयोजन करण्यात आले आहे. पुढील वर्षी एकदिवसीय विश्वचषकही भारतात होणार असून जगभरातील सर्व मोठे संघ त्यात सहभागी होतील.' असे केंद्रीय क्रीडा मंत्री अनुराग ठाकूर अनुराग ठाकूर म्हणाले.

'कोणत्याही खेळाबाबत तुम्ही भारताकडे दुर्लक्ष करू शकत नाही. भारताने खेळांमध्ये, विशेषतः क्रिकेटमध्ये खूप योगदान दिले आहे. भारतात पुढील वर्षी विश्वचषकाचे आयोजन केले असून, हा भव्य आणि ऐतिहासिक सोहळा असेल.' असे अनुराग ठाकूर म्हणाले.

दरम्यान, जय शहा (Jay Shah) यांच्या वक्तव्यामुळे पाकिस्तान क्रिेकेट मंडळ चांगलेच आक्रमक झाले आहे. त्यांनी थेट टोकाची भूमिका घेत विश्वचषकात संघ न पाठविण्याची एकप्रकारे धमकीच दिली आहे. तसेच, मंडळाने जय शहा यांनी असे वक्तव्य करताना संभाळून करावे असे म्हटले आहे. त्यांच्या अशा वक्यव्यामुळे आंतरराष्ट्रीय पातळीवर वेगळा संदेश जातो असेही त्यांनी म्हटले आहे.