विश्वकरंडक महिला बुद्धिबळ स्पर्धेच्या पहिल्या डावात भक्तीची बरोबरी

पणजी: महिलांच्या विश्वकरंडक बुद्धिबळ स्पर्धेच्या दुसऱ्या फेरीत भारताची इंटरनॅशनल मास्टर बुद्धिबळपटू भक्ती कुलकर्णी (Bhakti Kulkarni) हिने शानदार खेळ करत पहिल्या डावात बरोबरी नोंदविली. रशियाच्या नतालिया पोगोनिना (Natalia Pogonina) हिच्याविरुद्ध भक्तीने अर्ध्या गुणाची कमाई केली. या दोघीतील दुसरा डाव बाकी आहे.

स्पर्धा रशियातील सोची (Sochi) येथे सुरू आहे. फिडेच्या मानांकनात भक्तीचे 2391, तर वूमन ग्रँडमास्टर पोगोनिना हिचे 2469 एलो गुण आहेत. दुसऱ्या फेरीतील भक्तीचा दुसरा डाव पोगोनिना हिच्याविरुद्ध शुक्रवारी खेळला जाईल, त्यावेळी भक्तीकडे काळ्या प्यादी असतील. भारतीय महिला बुद्धिबळ संघाचे व्यवस्थापक ग्रँडमास्टर अभिजित कुंटे यांनी दिलेल्या माहितीनुसार, गोवा बुद्धिबळ संघटनेचे सचिव किशोर बांदेकर यांनी सांगितले, की ‘‘भक्तीने मानांकनात सरस असलेल्या खेळाडूविरुद्ध जबरदस्त खेळ केला. प्रतिस्पर्धी पोगोनिना वेळेच्या दबावाखाली आली आणि तिने सामना वाचविण्यावर भर दिला. हा डाव कॅटलन ओपनिंगने झाला. भक्तीची बाजू किंचित वरचढ होती, परंतु नंतर दोघींवर वेळेचा दबाव आला आणि डाव बरोबरीत राहिला.’’