पणजी: चर्चिल ब्रदर्सने आय-लीग फुटबॉल स्पर्धेत सोमवारी नेरोका एफसीवर 3-1 फरकाने विजय नोंदवून तिसरा क्रमांक मिळविला. सामना कोलकात्यातील कल्याणी स्टेडियमवर झाला.
चर्चिल ब्रदर्सच्या स्पर्धेतील नवव्या विजयात नायजेरियन केनेथ इकेचुक्वू याने दोन गोल केले. त्याने अनुक्रमे 40 व 77 व्या मिनिटास चेंडूस नेटची अचूक दिशा दाखविली. त्यापूर्वी सेनेगलच्या मोमो सिसे याने 36 व्या मिनिटास गोव्यातील संघासाठी आघाडीचा गोल केला होता. नेरोका एफसीच्या खाती एकमात्र गोल भरपाई वेळेतील पहिल्या मिनिटास नोंदीत झाला. नेरोका एफसीच्या खेळाडूचा फटका दिशाहीन करण्याच्या प्रयत्नात सुरेश मेतेई याने स्वयंगोल केला.
चर्चिल ब्रदर्सचे आता 17 सामन्यांतून 30 गुण झाले आहेत. मागील सामन्यात त्यांना मोहम्मेडन स्पोर्टिंगने हरविले होते, मात्र सोमवारच्या लढतीत माजी आय-लीग विजेत्यांनी शानदार खेळ करत चौथ्या क्रमांकावरील पंजाब एफसीला तीन गुणांनी मागे टाकले. विजेतेपदासमीप असलेल्या अव्वल स्थानावरील गोकुळम केरळाचे 40, तर दुसऱ्या क्रमांकावरील मोहम्मेडन स्पोर्टिंगचे 34 गुण असून ते प्रत्येकी 16 सामने खेळले आहेत. नेरोका एफसीला सलग तिसरा, तर एकंदरीत सहावा पराभव पत्करावा लागला, त्यामुळे 17 लढतीनंतर त्यांचे 19 गुण व सातवा क्रमांक कायम राहिला. चर्चिल ब्रदर्सचा स्पर्धेतील शेवटचा सामना शनिवारी (ता. 14) श्रीनिदी डेक्कन संघाविरुद्ध होईल.
सलग पाचवा विजय
आय-लीग स्पर्धेत चर्चिल ब्रदर्सने नेरोका एफसीवर सलग पाचवा विजय नोंदविला. यंदा स्पर्धेच्या पहिल्या टप्प्यातही गोव्यातील संघाने मणिपूरच्या संघाविरुद्ध सामना 4-2 फरकाने जिंकला होता.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
