एफसी गोवा मुसंडी मारण्याइतपत सक्षम : नोगेरा

आपला संघ मुसंडी मारण्याइतपत निश्चितच सक्षम असल्याचे त्यांनी (Alberto Nogera) मंगळवारी सांगितले.
एफसी गोवा मुसंडी मारण्याइतपत सक्षम : नोगेरा
Alberto NogeraDainik Gomantak

पणजी : इंडियन सुपर लीग (ISL) फुटबॉल स्पर्धेत एफसी गोवा (FC Goa) संघाला पहिल्याच लढतीत नामुष्कीजनक हार पत्करावी लागली, मात्र त्यांचा स्पॅनिश आल्बर्टो नोगेरा (Alberto Nogera) आशावादी आहे. आपला संघ मुसंडी मारण्याइतपत निश्चितच सक्षम असल्याचे त्यांनी मंगळवारी सांगितले.

फातोर्डा येथील पंडित जवाहरलाल नेहरू स्टेडियमवर सोमवारी झालेल्या लढतीत एफसी गोवास गतविजेत्या मुंबई सिटी एफसीकडून तीन गोलने हार पत्करावी लागली. गतमोसमात एफसी गोवाचा स्टार स्ट्रायकर राहिलेल्या इगोर आंगुलो याने दोन, तर ब्राझीलियन य्गोर कातातौ याने एक गोल केला. कालच्या लढतीत हुआन फेरांडो यांच्या मार्गदर्शनाखालील एफसी गोवा संघ साफ निष्प्रभ ठरला. त्यामुळे आयएसएल स्पर्धेतील त्यांची 15 अपराजित सामन्यांची मालिका खंडित झाली. एफसी गोवाचा स्पर्धेतील पुढील सामना शुक्रवारी बांबोळी येथील स्टेडियमवर जमशेदपूर एफसीविरुद्ध होईल.

Alberto Nogera
30व्या राष्ट्रीय बेंचप्रेस स्पर्धेत गोव्याची उल्लेखनीय कामगिरी

आल्बर्टो नोगेरा 32 वर्षांचा असून या स्पॅनिश मध्यरक्षकाचा एफसी गोवातर्फे यंदा दुसरा आयएसएल मोसम आहे. गतमोसमात तो आयएसएल स्पर्धेतील सर्वोत्तम पास पुरस्काराचा मानकरी ठरला होता. त्याने आठ असिस्ट व एका गोलची नोंद केली होती.

``संघातील नवोदितांना मदत करताना स्थिती बदलण्याबाबत जबाबदारी घेण्याची माझी तयारी आहे. मी संघातील सीनियर खेळाडू आहे या नात्याने नव्हे, तर कालचा दिवस खराब होता हे सिद्ध करण्याची क्षमता आमच्यात आहे या कारणास्तव मी भार उचलू इच्छितो,`` असे नोगेरा याने नमूद केले. ``प्रगती साधण्याची आमची इच्छा आहे. माझा संघावर भरवसा आहे. आम्ही काही बाबींत बदल घडवू शकतो, पुन्हा एकदा चांगला मोसम अनुभवू शकतो याची खात्री आहे. माझा शंभर टक्के या संघावर विश्वास आहे,`` असे स्पॅनिश मध्यरक्षक म्हणाला.

`पुढील सामना लगेच हे चांगले`

एफसी गोवाचा पुढील सामना लगेच ही चांगली बाब आहे, असे नोगेरा याला वाटते. संघाच्या सरावात आगामी सामन्यासाठी तयारी केली जाईल. भूतकाळाविषयी आम्हाला जास्त विचार करायचा नाही. नवा सामना आम्हाला संधी देणारा ठरेल, असे सांगत नोगेरा याने एफसी गोवाने मुंबई सिटीविरुद्ध निराशाजनक खेळ केल्याचे मान्य केले.

Related Stories

No stories found.
Dainik Gomantak | दैनिक गोमन्तक
www.dainikgomantak.com