प्रीमियर लीगमध्ये संयमी समरमुळे ‘जीनो’ची बाजी

GCA Premier League : अनिर्णित लढतीत कोशंटवर धेंपो क्लबला टाकले मागे
GCA Premier League
GCA Premier LeagueDainik Gomantak

पणजी : यष्टिरक्षक-फलंदाज समर दुभाषी याच्या संयमी, समजूतदार फलंदाजीमुळे जीनो स्पोर्टस क्लबने शुक्रवारी जीसीए प्रीमियर लीग क्रिकेट स्पर्धेत बाजी मारली. विजेतेपद पटकाविताना त्यांनी धेंपो क्रिकेट क्लबला कोशंटवर मागे टाकले.

पर्वरी येथील जीसीए अकादमी मैदानावर झालेला दोन दिवसीय अंतिम सामना अनिर्णित राहिला. रात्री पडलेल्या पावसामुळे शुक्रवारीही खेळ सुरू होण्यास  विलंब झाला. धेंपो क्लबने पहिला डाव 6 बाद 241 धावांवर घोषित केला. विजेतेपदासाठी त्यांना जीनो क्लबचा डाव गुंडाळणे आवश्यक होता. दिवसाचा खेळ थांबला तेव्हा जीनो क्लबने पहिल्या डावात 6 बाद 187 धावा केल्या. विजेता संघ ठरविण्यासाठी कोशंटचा आधार घ्यावा लागला व त्यात जीनो क्लब सरस ठरला.

GCA Premier League
मामा गोविंदासोबतच्या नात्यावर कृष्णा अभिषेकने केला खुलासा; म्हणाला...

समरच्या नाबाद 73 धावा

राम दयाल व हर्षद गडेकर या मध्यमगती गोलंदाजांनी जीनो क्लबला कोंडीत पकडले, पण समर दुभाषीने जबरदस्त एकाग्रतेने फलंदाजी केली. त्यामुळे धेंपो क्लबला उपविजेतेपदावर समाधान मानावे लागले. संघ 3 बाद 20 असा संकटात असताना समरने कर्णधार अमोघ देसाईसह (27) चौथ्या विकेटसाठी 50 धावांची भागीदारी केली. नंतर निम्मा संघ 83 धावांत गारद झाल्यानंतर समरने गौरीश कांबळी (33) याच्यासह सहाव्या विकेटसाठी 60 धावांची भागीदारी करून प्रतिस्पर्ध्यांना यश मिळू दिले नाही. अंधूक प्रकाशामुळे धेंपो क्लबलाही फिरकी माऱ्यावरच भर द्यावा लागला. गौरीशला फिरकी गोलंदाज विकास सिंगने बाद केल्यानंतर मोहित रेडकरने (नाबाद 21) समयोचित फलंदाजी करत संघाचे आणखी नुकसान टाळले. 73 धावांवर नाबाद राहिलेल्या समरने 170 चेंडूंचा सामना केला व दहा चौकार मारले.

दीपराज, अमोघ, ऋत्विक सर्वोत्तम

करिमाबाद क्लबचा दीपराज गावकर (310 धावा) स्पर्धेचा मानकरी ठरला. जीनो क्लबच्या अमोघ देसाईची (305 धावा) उत्कृष्ट फलंदाज, तर याच संघाच्या ऋत्विक नाईक (16 विकेट) याची उत्कृष्ट गोलंदाज पुरस्कारासाठी निवड झाली. बक्षीस वितरण गोवा क्रिकेट असोसिएशनचे सचिव विपुल फडके, सदस्य मोहन चोडणकर, आयसीए सदस्य सुरेश महादेवन, जीसीए प्रशिक्षण संचालक प्रकाश मयेकर, माजी रणजी कर्णधार प्रशांत काकोडे, बाळकृष्ण मिस्कीन, जीनोचे पदाधिकारी सुनील आजगावकर यांच्या उपस्थितीत झाला.

संक्षिप्त धावफलक

धेंपो क्रिकेट क्लब, पहिला डाव : 60 षटकांत 6 बाद 241 घोषित अनिर्णित वि. जीनो स्पोर्टस क्लब, पहिला डाव : 65 षटकांत 6 बाद 187 (अमोघ देसाई 27, समर दुभाषी नाबाद 73, रवी जांगिड 11, गौरीश कांबळी 33, मोहित रेडकर नाबाद 21, राम दयाल 3-40, हर्षद गडेकर 2-24, विकास सिंग 1-40).

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
dainikgomantak.esakal.com