Goa: सलामीची पूर्वजा वेर्लेकर (Purvaja Verlekar) हिचे नाबाद अर्धशतक, तसेच कर्णधार शिखा पांडेच्या (Captain Shikha Pandey) अष्टपैलू खेळीच्या बळावर गोव्याने गुरुवारी सीनियर महिला एकदिवसीय क्रिकेट (Women's Cricket) स्पर्धेत तिसऱ्या विजयाची नोंद केली. एलिट ड गट सामन्यात त्यांनी गुजरातला सात विकेट राखून हरविले.
सामना विझियानगरम येथील डॉ. पीव्हीजी राजू एसीए क्रीडा संकुल मैदानावर झाला. गोव्यासमोर विजयासाठी 136 धावांचे लक्ष्य होते. 37.2 षटकांत 3 विकेट गमावून गोव्याने विजयाची औपचारिकता पूर्ण केली. पावसामुळे सामना प्रत्येकी 47 षटकांचा करण्यात आला होता.
पूर्वजा हिने 99 चेंडूंत सात चौकारांच्या मदतीने नाबाद 56 धावा केल्या. तिने शिखा समवेत चौथ्या विकेटसाठी 48 धावांची अभेद्य भागीदारी केली. शिखाने 29 चेंडूंत तीन चौकारांच्या मदतीने नाबाद 22 धावा केल्या. त्यापूर्वी पूर्वजाने तेजस्विनी दुर्गद हिच्यासमवेत दुसऱ्या विकेटसाठी 61 धावांची भागीदारी करून गोव्याच्या विजयाचा पाया रचला होता. शिखा पांडे, पूर्वा भाईडकर व रूपाली चव्हाण यांनी प्रत्येकी दोन विकेट टिपत गुजरातचा डाव 7 बाद 135 धावांत रोखण्यात मोलाचा वाटा उचलला होता.
मध्य प्रदेश अव्वल, गोवा द्वितीय
एलिट ड गटात सर्व चारही सामने जिंकून मध्य प्रदेश संघ 16 गुणांसह अव्वल आहे. गोवा गटात दुसऱ्या स्थानी आहे. तीन विजय व एका पराभवासह त्यांचे 12 गुण झाले आहेत. गोव्याचा शेवटचा सामना शनिवारी 6 नोव्हेंबरला चारही सामने गमावलेल्या मिझोरामविरुद्ध होईल. गटात विदर्भचे 10, गुजरातचे 6, तर हरियानाचे 4 गुण झाले आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
