पणजी ः गोव्यातील (Goa) करूणा फुटबॉल प्रतिष्ठानची (Karuna Football Foundation) वंचित मुलींसाठी राष्ट्रीय पातळीवरील निवासी फुटबॉल अकादमी (Residential Football Academy) रविवारी राष्ट्रीय क्रीडादिनी नुवे येथील होली रोझरी कॉन्व्हेंट हायस्कूल संकुलात सुरू झाली. गोवा क्रीडा प्राधिकरणाचे कार्यकारी संचालक वसंत प्रभुदेसाई, गोवा फुटबॉल विकास मंडळाचे (जीएफडीसी) अध्यक्ष अर्जुन पुरस्कार विजेते ब्रह्मानंद शंखवाळकर, अखिल भारतीय फुटबॉल महासंघाचे राष्ट्रीय तांत्रिक संचालक सावियो मदेरा यांच्या उपस्थितीत अकादमीची मुहूर्तमेढ रोवली गेली. ग्रामीण गोव्यातील मुलींच्या फुटबॉलला प्रेरणा देणे हा अकादमीचा मुख्य उद्देश आहे. अकादमी गोव्यातील १४ मुलींव्यतिरिक्त मणिपूरमधील पाच, तमिळनाडूतील तीन, तर केरळ व महाराष्ट्रातील प्रत्येकी एक मुलगी आहे.
अकादमी उद्‍घाटनाच्या वेळेस महिला फुटबॉलपटूमध्ये दिग्गज कामगिरी केलेल्या गोव्याच्या माजी खेळाडूंना गौरविण्यात आले. यामध्ये योलांडा डिसोझा, ज्युलियाना गुरजाव-कुलासो, सुकोरिना परेरा, रितिन्हा परेरा, मारिया रिबेलो यांचा समावेश होता. करूणा प्रतिष्ठानच्या अकादमीस सर्वोत्तम प्रशिक्षक, फिजिओथेरापिस्ट, आहारतज्ज्ञ पुरविण्यासाठी, तसेच फातोर्डा येथे कृत्रिम टर्फ मैदानावर सरावाची संधी देण्याबाबत राज्य सरकार सहकार्य करेल, असे आश्वासन प्रभुदेसाई यांनी दिले. मुलींच्या फुटबॉल अकादमीत यूईएफए परवानाधारक जर्मनीचे हैदी शूनेमन यांची तांत्रिक संचालकपदी नियुक्ती करण्यात आली आहे. मारियो आगियार अकादमीचे मुख्य प्रशिक्षक आहेत. मारिया रिबेलो व नाओमी वासे या सहाय्यक प्रशिक्षक आहेत.
बेरोजगार पालकांच्या मुली...
करूणा प्रतिष्ठानच्या फुटबॉल अकादमीत निवडण्यात आलेल्या मुलींचे पालक बेरोजगार आहेत. कोरोना विषाणू महामारीच्या काळात या मुलींच्या पालकांना रोजगार गमवावा लागला. त्या मुलींच्या गुणवत्तेला आता अकादमीत खतपाणी घातले जाईल. मुलींच्या शिक्षणाची सोय होली रोझरी स्कूलमध्ये करण्यात आली असून राय येथील एसव्हीडी मैदानावर सराव केंद्र असेल.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
